Fact-info.az-ın məlumatına görə,  bu sözləri AZƏRTAC-a açıqlamasında “Minadan Zərərçəkənlərin Assosiasiyası” İctimai Birliyinin sədri, qazi Rey Kərimoğlu söyləyib.

QHT sədri bildirib ki, 30 illik işğala məruz qalan Azərbaycan Vətən müharibəsində Zəfər qazandıqdan sonra mina problemi daha qabarıq üzə çıxmağa başlayıb. Belə ki, işğaldan azad edilmiş ərazilərdə bərpa və quruculuq işləri aparılarkən yüzlərlə insan minaya düşüb, 50 nəfərdən çox insan həyatını itirib, digərləri ağır xəsarətlər alıblar.

“Dinc insanların mina təhlükəsindən zərər görməsi prosesi hələ də davam edir. Bu, bizi çox narahat edir. Bizi daha çox narahat edən beynəlxalq ictimaiyyətin bu məsələyə susqunluq nümayiş etdirməsidir. Ermənistana “gözün üstündə qaşın var” deyən yoxdur, amma 30 il işğaldan əziyyət çəkən və öz torpaqlarını qan bahasına xilas edən Azərbaycanda dinc insanlar mina terrorunun qurbanı olduğu halda, buna münasibət bildirilmir. Hiddət doğuran səbəblərdən biri də mina insidentlərinin 70 faizindən çoxunun əvvəllər “təmas xətti” olan ərazilərdən kənarda baş verməsidir. Mina insidentlərinə məzarlıqlar, bulaqlar, yol keçidləri və otlaqlarda rast gəlinir”, - deyə, QHT sədri qeyd edib.

R.Kərimoğlu bundan əvvəl də beynəlxalq təşkilatlara müraciət etdiklərini bildirib. Deyib ki, onlar Ermənistanın mina xəritələrini verməməsi ilə bağlı da beynəlxalq təşkilatlara müraciət ediblər. “Mina problemi aradan qaldırılana qədər mübarizəmizi davam etdirəcəyik. Tələbimiz Azərbaycanın mina probleminin aradan qaldırılmasında dəstək vermək, Ermənistana təzyiqlər etməkdir”, - deyə o vurğulayıb.

Mina xəritələri ilə bağlı fikirlərini bölüşən Rey Kərimoğlu diqqətə çatdırıb ki, Azərbaycanın təkidli tələblərindən sonra Ermənistanın təqdim etdiyi xəritələr dəqiq deyil. Narahatlıq doğuran problemlərdən biri də budur. QHT-lərin tələblərindən biri də minaların dəqiq xəritələrinin verilməsi ilə bağlıdır.

“Prezident İlham Əliyevin təşəbbüsü ilə qlobal miqyasda Dayanıqlı İnkişaf Məqsədlərinə nail olmaq üçün Azərbaycan humanitar minatəmizləmə üzrə yeni və xüsusi - 18-ci Dayanıqlı İnkişaf Məqsədini təklif edib. Hesab edirik ki, bu, dünya birliyinin diqqətini qlobal mina təhdidinə yönəldəcək. Bu təşəbbüs humanitar təmizləmə aksiyasını özündə təcəssüm etdirir. İnanıram ki, istəyimizə nail olacağıq”, - deyə QHT sədri fikirlərini yekunlaşdırıb.