Azərbaycan həm ikitərəfli münasibətlər, həm də beynəlxalq təşkilatlar çərçivəsində səmərəli və qarşılıqlı faydalı əməkdaşlıq əlaqələrini uğurla davam etdirir. Azərbaycan ilə Pakistan arasında mövcud olan strateji tərəfdaşlıq uzun illərə söykənən dostluq və qardaşlıq prinsiplərinə əsaslanır. Hər iki dövlət tarix boyu bir-birinə dəstək nümayiş etdirərək beynəlxalq aləmdə ortaq maraqlara əsaslanan siyasət yürütməkdədir.

Pakistan Azərbaycanın müstəqilliyini ilk tanıyan ölkələrdən biri kimi, həm də 44 günlük Vətən müharibəsində bütün potensialı ilə beynəlxalq platformalarda ölkəmizin mövqeyini müdafiə etməklə mənəvi-siyasi həmrəylik nümayiş etdirib. Fact-info.az xəbər verir ki, bu fikirləri Milli Məclisin deputatı Cavanşir Feyziyev Prezident İlham Əliyevin və Pakistanın Baş naziri Məhəmməd Şahbaz Şərifin birgə mətbuat konfransı ilə bağlı şərhində bildirib.

O qeyd edib ki, bu gün ölkələrimiz arasında iqtisadi, mədəni, siyasi, hərbi sahələri özündə ehtiva edən bu strateji münasibət müxtəlif istiqamətlərdə əməkdaşlığın daha da şaxələnməsinə xidmət edən önəmli anlaşma və layihələrin həyata keçirilməsi ilə daha da möhkəmlənməkdədir.

Liderlərin öz çıxışlarında Azərbaycan-Pakistan əlaqələrinin yüksək səviyyəsini məmnunluqla vurğuladığını bildirən Cavanşir Feyziyev ölkələrimiz arasında müxtəlif sahələrdə işbirliyinin genişləndirilməsi yönündə atılan addımlardan söz açıb. Deputat əlavə edib ki, görüş zamanı Prezident İlham Əliyev Azərbaycanın dövlət müstəqilliyini tanıyan ilk ölkələrdən biri olan Pakistanla ölkəmiz arasında mövcud olan qardaşlıq bağlarının önəmini vurğulayıb, eyni zamanda, siyasi, iqtisadi, hərbi və mədəni sahələrdə işbirliyinin uğurla inkişaf etdiyini bildirib. Xüsusilə enerji sektorunda birgə layihələrin həyata keçirilməsi və ticarət dövriyyəsinin artırılması yönündə görülən işlərdən danışan Prezident, həmçinin Pakistanın Azərbaycanın haqq işinə daimi dəstəyinin yüksək dəyərə malik olduğunu qeyd edib.

Baş nazir Şahbaz Şərif isə öz çıxışında Azərbaycanla Pakistan arasında mövcud dostluq və qardaşlıq əlaqələrinin tarixi köklərə dayandığını vurğulayıb. O, Azərbaycanın ərazi bütövlüyünü və suverenliyini dəstəklədiklərini bir daha təsdiqləyib. Baş nazir, həmçinin iqtisadi işbirliyinin genişləndirilməsi, enerji və nəqliyyat sahələrində birgə layihələrin həyata keçirilməsi üçün geniş potensialın mövcud olduğunu bildirib. O, Pakistanın Azərbaycanla hərbi və müdafiə sahələrində də əməkdaşlığı dərinləşdirmək niyyətində olduğunu ifadə edib.

Hər iki lider beynəlxalq qurum və quruluşlar çərçivəsində qarşılıqlı dəstəyin davam etdiriləcəyini və regional təhlükəsizlik məsələlərində birgə fəaliyyətin vacibliyini vurğulayıb.

Cavanşir Feyziyev xatırladıb ki, Azərbaycanın müstəqilliyini bərpa etməsindən dərhal sonra, 1991-ci ildə, Pakistanın bizim müstəqilliyimizi tanıyan ilk dövlətlərdən biri olması, iki respublika arasında sıx bağların başlanğıcı sayılır. 1994-cü ildə Ümummilli Lider Heydər Əliyevin Pakistanın ovaxtkı Baş naziri Bənazir Bhutto ilə keçirdiyi görüşdən sonra ikitərəfli əlaqələr yeni inkişaf mərhələsinə qədəm qoyub. 1995-ci ildə Pakistan Prezidenti Faruk Əhməd Xan Leqarinin Bakıya rəsmi səfəri və 1996-cı ildə Heydər Əliyevin Pakistana rəsmi səfəri əlaqələrimizin möhkəmlənməsində önəmli rol oynayıb. O illərin şahidləri çox yaxşı bilir ki, həmin qarşılıqlı səfərlər o zaman bizim üçün böyük önəm daşıyırdı. Bu gün isə həmin səfərlər bir irs kimi hər iki xalq üçün dəyərlidir.

Deputatın sözlərinə görə, Prezident İlham Əliyev də Pakistanla əlaqələrin inkişafına xüsusi önəm verir. Dövlətimizin başçısının Pakistana mütəmadi səfərləri, xüsusilə ötən ilin iyulundakı dövlət səfəri, eləcə də Pakistan Prezidentinin və Baş nazirlərinin müxtəlif illərdə Azərbaycana rəsmi səfərləri ikitərəfli əlaqələrin daha da güclənməsinə töhfələr verib. Cavanşir Feyziyevin fikrincə, on il öncə – 2015-ci ildə imzalanan “Azərbaycan Respublikası ilə Pakistan İslam Respublikası arasında strateji tərəfdaşlıq haqqında Birgə Bəyannamə” əlaqələrin inkişafında önəmli addım olub. Prezident İlham Əliyevin ötən il iyulunda Pakistana dövlət səfəri çərçivəsində əməkdaşlığın müxtəlif sahələrini əhatə edən 15 sənədin mübadiləsi isə Azərbaycan və Pakistan arasında müqavilə-hüquq bazasını daha da genişləndirib.

Azərbaycan və Pakistan arasında iqtisadi sahədə əməkdaşlığın xüsusi diqqət çəkdiyini vurğulayan deputat bildirib ki, ticarət dövriyyəsinin artırılması, enerji sektorunda birgə layihələrin həyata keçirilməsi istiqamətində atılan addımlar, hər iki ölkənin iş adamlarının birgə təşkil etdiyi biznes forumlar və sərgilər iqtisadi işbirliyinin genişlənməsinə yönəlik münbit ortam yaradır.

Müdafiə sənayesi, hərbi təlimlər və təcrübə mübadiləsi yönlərində birgə fəaliyyətlər isə hər iki ölkənin müdafiə qabiliyyətinin gücləndirilməsinə xidmət etməkdədir.

Azərbaycan və Pakistan arasında elmi-mədəni sahədə əməkdaşlıqdan söz açan Cavanşir Feyziyev bildirib ki, tələbə mübadiləsi proqramları, mədəni tədbirlər və sərgilər vasitəsilə xalqlar arasında qarşılıqlı anlaşma və dostluq münasibətləri getdikcə daha da möhkəmlənir.

"Pakistan Ermənistanı Azərbaycan torpaqlarını işğal etdiyinə görə tanımayan ölkədir. Bu isə qardaşlığın əsl nümayişidir. İki ölkə arasında hörmət və etimada əsaslanan qarşılıqlı münasibətlər strateji tərəfdaşlığın, iqtisadi, siyasi, hərbi, mədəni sahələrdə əməkdaşlığın ən uğurlu nümunəsi kimi öz əhəmiyyətini daha da artıracaq", - deyən deputat fikirlərini yekunlaşdırıb.