Fact-info.az xəbər verir ki, bunu APA-ya açıqlamasında Milli Məclisin deputatı Fatma Yıldırım deyib.

Deputat bildirib ki, Prezident İlham Əliyevin Şuşa şəhərinə budəfəki səfərində tikintisinin gedişi ilə tanış olduğu 1 saylı tam orta məktəb də məhz bu baxımdan xüsusi əhəmiyyət daşıyır. Məktəb binasının inşası bu qədim şəhərin təhsil mərkəzi şöhrətinin qaytarılması missiyasına xidmət edən növbəti addımdır: “Səfər zamanı Şuşa şəhər xəstəxanasının tikintisi ilə maraqlanması da bir daha təsdiqləyir ki, əhalinin sağlamlığı daim dövlətimizin başçısının diqqət mərkəzindədir. Bu baxımdan işğaldan azad edilən ərazilərdə də tibb və səhiyyə xidmətlərinin təşkili üçün qısa bir müddətdə genişmiqyaslı işlər həyata keçirilir. Şuşa şəhər xəstəxanası burada yaşayacaq əhalinin tibbi təminatı və sağlamlığının qorunması istiqamətində Prezident İlham Əliyevin birbaşa göstərişi və rəhbərliyi ilə icra olunan infrastruktur layihələrindən biridir. Bu, həm də onu göstərir ki, azad edilmiş digər ərazilərdə olduğu kimi, Şuşada da səhiyyə ocaqlarının inşası dövlətimiz üçün prioritet məsələlərdəndir”.

Fatma Yıldırım qeyd edib ki, tarixi Şuşa şəhəri işğaldan azad olunduqdan sonra mühüm yerli və beynəlxalq tədbirlərə ev sahibliyi edib: “Şuşa Qlobal Media Forumu da bu baxımdan böyük əhəmiyyət kəsb edir. Forumda 49 ölkədən 150 xarici qonaq, o cümlədən dünyanın 34 ölkəsinin dövlət informasiya agentliyi, 12 beynəlxalq təşkilat və media qurumunun, eləcə də 60 yerli media rəhbəri və nümayəndəsinin iştirakı bu tədbirin önəminin göstəricisidir. Prezident İlham Əliyev Forumda bir çox məsələlərlə bağlı fikirlərini açıqladı, mühüm mesajlar verdi. Əlbəttə ki, burada regionumuzda vəziyyət, Azərbaycanla Ermənistan arasında münasibətlərin normallaşdırılması, işğaldan azad olunmuş ərazilərimizdə quruculuq işləri, keçmiş məcburi köçkünlərin məskunlaşdırılması və s. məsələlər daxildir. Dövlət başçısının dediyi kimi, əgər Ermənistan Azərbaycana qarşı hər hansı ərazi iddialarından imtina etsə, sülh sazişinin ilin sonuna qədər imzalanması mümkündür”.

Deputat ən vacib məqamlardan birinin keçmiş məcburi köçkünlərin dogma yurdlarına qayıtması olduğunu vurğulayıb: “Qarabağın və Şərqi Zəngəzurun bərpası prosesi mərhələlərə bölünüb. Artıq birinci “Böyük Qayıdış” dövlət proqramı qəbul edilib, proqramın icrası üçün maliyyə resursları səfərbər edilib. Birinci mərhələdə dövlətimizin əsas vəzifəsi 8 şəhəri və 100 kəndi yenidən qurmaqdır. Növbəti üç il ərzində Qarabağ və Şərqi Zəngəzur rayonları üzrə 150 mindən çox insanın məskunlaşdırılması nəzərdə tutulur.

“Qarabağın erməni sakinlərinə gəlincə, dövlətimizin başçısı Forumda bu məsələ ilə bağlı aydın şəkildə mövqeyini ifadə edib. Bu mövqe ondan ibarətdir ki, Qarabağdakı erməni azlığının hüquqları və təhlükəsizliyi Konstitusiyamıza uyğun olaraq qorunacaq. Azərbaycanda digər məsələlərdə olduğu kimi, burada da xoş niyyətin nümayiş etdiriləcəyini deyən Prezident bildirib: “Azərbaycan multietnik, çoxdinli ölkədir. Bu da bizim sərvətimizdir, gücümüzdür. Bütün müxtəlif etnik qrupların, Azərbaycanda yaşayan qrupların nümayəndələri eyni hüquqlara malikdir, eyni öhdəlikləri var və onların təhlükəsizliyi eyni səviyyədə qorunur. Nə üçün hər hansı bir etnik qrup istisna olmalıdır və digərlərindən üstün olmalıdır? Mən bunu anlamıram. Yəni, bizim yanaşmamız budur. Biz hələ də ümid edirik ki, Xankəndidə yaşayan insanların sağlam düşüncəyə malik bir hissəsi dərk edəcək ki, bu yanaşmanın perspektivi yoxdur”. Azərbaycanı görməzdən gəlməyin mümkün olmadığını vurğulayan dövlətimizin başçısı qeyd edib ki, sağlam düşüncə qalib gəlməlidir. Ona görə də, Qarabağ erməniləri dövlətimizin xoş niyyətini nə qədər tez anlasalar, bir o qədər özləri üçün yaxşı olacaq”.