Fact-info.az-ın əldə etdiyi məlumata görə, turizm sahəsində görüləcək işlərlə bağlı Dövlət Turizm Agentliyinin Qoruqları İdarəetmə Mərkəzinin idarə heyətinin sədri Murad Ağabəyli açıqlamasında bildirib ki, istiqamətlərdən birincisi Tuğun tarixi memarlıq üslubunu saxlamaqla mədəni turizmin inkişaf etdirilməsi üzrə, ikincisi Tuğun zəngin təbiətindən istifadə etməklə ekoturizmin inkişaf etdirilməsi, üçüncü istiqamət isə Tuğun aqroturizm potensialı üzrədir.

“İlkin mərhələdə biz Tuğun tarixi hissəsində turizm infrastrukturunun yaradılması istiqamətində işlər aparacağıq. Artıq bu istiqamətdə işlər başlanıb. Biz konsepsiyalara uyğun müxtəlif obyektlərin layihələndirilməsi işlərini həyata keçiririk. Kəndin girişində avtodayanacaq, digər zəruri turizm infrastrukturlarının yaradılmasını, ikinci istiqamətdə kənd məktəbinin, Məlik saray kompleksinin bərpa edilməsini düşünürük və digər istiqamətdə turizm informasiya mərkəzinin, kulinariya mərkəzinin qurulmasını, eyni zamanda, iaşə obyektlərinin qurulmasını planlamışıq. Tuğun tarixi memarlıq üslubuna gəldikdə isə, göründüyü kimi binaların və tarixi abidələrin əksəriyyəti ermənilər tərəfindən vandalizmə məruz qalıb. İşğal dövründə bir çox abidələrimizin tarixi görkəmi dəyişdirilib. Biz xarici və yerli ekspertlərin birgə səyləri nəticəsində həmin abidələri yenidən araşdıracağıq və onları ilkin tarixi görkəminə qaytaracağıq. Tuğun mərkəzində turizm informasiya mərkəzi yaradılacaq. Beləliklə, Şuşaya gedən turistlər ətraf kəndlər barədə buradan məlumat ala biləcəklər”, - deyə Murad Ağabəyli qeyd edib.

Hadrut turizminin bərpası haqqında danışan Murad Ağabəyli bildirib ki, bu yerin tarixi hissəsində yerləşən qədim Alban məbədinin ətrafında olan üç evlə birlikdə vahid kompleks şəklində bərpa edilməsi nəzərdə tutulur: “Çünki həmin məbəd digər abidələrimiz kimi erməni vandalizminə məruz qalıb. Məbəd tarixi görünüşünü itirib. Ermənilər məbədi özününküləşdirmək üçün bir çox dəyişikliklər ediblər. Abidənin bərpası üçün ekspertlərin tədqiqatından yararlanaraq onun tarixi görünüşünün qaytarılması nəzərdə tutulub. Bundan başqa, Hadrutun mərkəzi hissəsində turizm informasiya mərkəzi fəaliyyət göstərəcək ki, bunun sayəsində turistlər ətraf yerlər haqqında və Hadrut haqqında məlumat əldə edə biləcəklər”.