Bu sözləri AZƏRTAC-ın Gürcüstan bürosuna müsahibəsində gürcü tarixçi alim, Qafqazın Geotarixi və Geosiyasi Araşdırmaları Beynəlxalq Mərkəzinin prezidenti Quram Marxuliya söyləyib.

O deyib ki, müstəqil dövlət quruculuğuna, siyasi sabitliyin möhkəmləndirilməsinə, yüksək iqtisadi artım templərinə nail olmaq, Azərbaycanın qısa müddətdə dünyanın ən dinamik inkişaf edən dövlətləri sırasına qoşulması Prezident İlham Əliyevin xidmətidir.

Onun sözlərinə görə, son 30 ildə gedən proseslər göstərdi ki, yeni Azərbaycanın böyük salnaməsini yazmaq, xalqın konsolidasiyasının, sülhün və harmoniyanın möhkəmlənməsi, habelə ölkənin düzgün xarici siyasət kursunun dəqiq müəyyənləşdirilməsi Azərbaycanın beynəlxalq aləmdə yeni qələbələrinə səbəb olan bir prosesdir. Ən maraqlısı isə ondadır ki, bütün bu nailiyyətlər olduqca mürəkkəb geosiyasi reallıqlar fonunda əldə edilib.

Tarixçi alim bildirib ki, ötən illər ərzində Azərbaycan yalnız gələcəyi üçün deyil, keçmişi üçün də mübarizə aparıb, tarixini qoruyub. Azərbaycanın yeni elmi, milli siyasət konsepsiyasının və təbliğatının həyata keçirilməsində mühüm işlər görülüb. Bu cəhətdən vətənpərvərlik Azərbaycan xalqının həyatında mühüm yer tutub.

Marxuliya vurğulayıb ki, müasir dünyada təbliğat silahlarının dövlətin potensial düşmənə qarşı metod və fəaliyyət arsenalında mühüm amil olduğunu dəqiq bilən lider, praqmatik siyasətçi İlham Əliyev milli maraqların və milli təhlükəsizliyin təmin olunması üçün çox böyük işlər görüb, Azərbaycanın hərbi gücünü inkişaf etdirib.

Dünya tarixinin təcrübəsi göstərir ki, resursların hazırlanması, toplanması və səfərbər edilməsi dövlətin hərbi təhlükəsizliyinin möhkəmləndirilməsi ilə sıx vəhdətdədir. XX və XXI əsrin əvvəllərində baş verən müharibə vasitələri və üsullarındakı genişmiqyaslı dəyişikliklər, qələbə qazanmaq üçün hərbi təlim keçmiş ehtiyatın əhəmiyyətini azaltmadı.

Ötən üç onillikdə Azərbaycan rəhbərliyi dünya birliyindən Qarabağ məsələsinin sülh yolu ilə həll olunmasını istədi. Lakin dünya birliyi bu çağırışa qulaq asmadı. Bu illər ərzində Azərbaycanın əsas diplomatik səyləri Dağlıq Qarabağ münaqişəsinin həlli yollarının tapılmasına yönəlmişdi. Bu, tamamilə təbiidir, çünki ölkənin ərazi bütövlüyünün bərpası Azərbaycan Respublikasının xarici siyasətinin əsas prioriteti və vəzifəsi idi. Diplomatik cəbhədə rəsmi Bakı həm dünyanın aparıcı oyunçuları, həm də nüfuzlu beynəlxalq strukturları ilə fəal işlərini davam etdirdi.

Tarixçi alim deyib: “Azərbaycan torpaqlarını işğaldan azad etmək üçün erməni terroruna qarşı mübarizə aparırdı. Ermənistanın azğın və səriştəsiz rəhbərliyinin Azərbaycana qarşı hücumları, təhqiramiz hərəkətləri cavabsız qalmadı. Cəmi 44 günlük müharibə göstərdi ki, Azərbaycan artıq 90-cı illərin əvvəllərindəki zəif Azərbaycan deyil. Azərbaycan iqtisadi, siyasi, hərbi və diplomatik sahələrdə sözə, nüfuza və gücə malik qüdrətli dövlətə çevrilib. Ən başlıcası isə onun əsl liderə məxsus bütün parametrləri özündə cəmləşdirən Prezidenti, Ali Baş Komandanı var. Məhz həmin liderin – Prezident İlham Əliyevin qətiyyəti sayəsində xalq arzusuna çatdı, torpaqları işğaldan azad olundu. Bununla da dünya birliyi güclü və qüdrətli Azərbaycan dövlətini tanıdı və artıq onunla hesablaşmağın vacibliyini dərk etdi.

Mərkəzin rəhbəri onu da bildirib ki, Azərbaycanın 44 günlük müharibədə tarixi və misli görünməmiş qələbəsi təkcə bir xalqın deyil, qonşu xalqların, dövlətlərin və bütövlükdə regionun inkişafına, çiçəklənməsinə rəvac verəcək.