18 iyul 2020-cil il tarixində saat 20:00-da Kürdəmirin Tədqiqi və Təbliği İctimai Birliyinin təşkilatçılığı ilə "Kürdəmir XIX əsrin sufizm (nəqşbəndiyyə) mərkəzi kimi: Mövlanə İsmayıl Siracəddin Kürdəmiri (Şirvani)" mövzusunda onlayn toplantı keçirilmişdir.

Son günlərdə Ermənistanın təcavüzkarlığına qarşı döyüşlərdə qəhrəmancasına həlak olmuş şəhidlərimizi yad etdikdən sonra Dəyirmi masanı açan t.e.d., prof. Habil Mammadov bildirdi ki, bu gün təkcə Azərbaycanda deyil, Qafqazda, Yaxın və Orta Şərqdə, müsəlman aləminin ictimai-siyasi həyatında böyük xidmətləri olmuş Mövlanə İsmayıl Siracəddin Kürdəmirinin (Şirvani) həyat və fəaliyyətindən bəhs ediləcəkdir.

O,Mövzunun aktuallığını və əhəmiyyətini diqqətə çatdırdıqdan sonra sözü Miras Mədəni İrsin Öyrənilməsinə Kömək İctimai Birliyinin sədri, t.ü.f.d Fariz Sabir Khalilliyə verdi. O, Mövlanə İsmayıl Siracəddin Şirvaninin həyat və fəaliyyəti, o cümlədən, Qafqazda müridizm hərəkatı haqqında dinləyicilərə geniş məlumat vermişdir. Daha sonra polemikanı t.ü.f.d., dos. Şəhla Nuruzadə, f.ü.f.d Yaqut Bahadurqızı və digər iştirakçılar davam etdirmişdir.

Daha sonra isə Fariz Xəllili ünvanlanan sualları cavablandırmışdır. Dəyirmi masada həmçinin t.e.d., prof. Nərgiz Əliyeva, t.e.n., dos. Məmmədağa Baxışov, filosof Məmmədtağı Rzayev, Miras İB-nin İH-nin sədri, AMEA M.Füzuli adına Əlyazmalar İnstitutunun elmi işçisi Şəhla Xəlilli, tarixçi Ağa Zeynallı, tarixçi Zeynal Səfərov iştirak etmişlər. Nuralı İsmayılov Mövlanə İsmayıl Siracəddin Kürdəmiri irsinin tədqiqində Fariz Xəlilliyə öz minnətdarlığını bildirmiş, bu irsin gələcək nəslə təbliğ olunmasının zəruriliyini xüsusi vurğulamışdır.

XIX əsrin görkəmli filosoflarından biri olan Hacı İsmayıl Siracəddin 1782-ci ildə Şamaxı xanlığının Bölükət mahalının Kürdəmir kəndində anadan olmuşdur. İlk təhsilini Məhəmməd Nuri əfəndidən alır. Daha sonra isə Müsəlman Şərq ölkələrinə gedərək mükəmməl dini təhsil alır. Bağdadda nəqşbəndiyyə təriqətinin mürşidi seçildikdən sonra doğma vətəni Kürdəmirə qayıdır. Kürdəmir Qafqazda nəqşbəndiyyəliyin yayılmasında dayaq rolunu oynamışdır. Minlərlə müridi olan Hacı İsmayıl əfəndi Şeyx Şamilin ilk müəllimi olmuşdur. Müridləri sırasında Mir Həmzə Nigari, Şeyx Mahmud əfəndi Almalı, Xas Məhəmməd Yaraqlı və s. olmuşdur. 1826-cı ildə II Rus-Qacar savaşı zamanı Hacı İsmayıl Ərzuruma ordan da Amasya şəhərinə gedir. Amasyada məskən salaraq öz müridlərini ətrafına toplayır.

1848-ci ilə qədər Amasya şəhərində fəaliyyət göstərmişdir. 1848-ci ildə vəba xəstəliyindən dunyasını dəyişmişdir. Məzarı Şamlar məzarlığındadır.