Xocalı faciəsindən 33 il keçir. XX əsrin sonunda baş vermiş bu faciə təkcə Azərbaycan xalqına deyil, bütün insanlığa, bəşəriyyətə qarşı yönəlmiş ən ağır cinayətlərdən biridir. 44 günlük  Vətən müharibəsində qəhrəman əsgərlərimizin hər zaman yanında olan, onların sağlamlığının keşiyində duran, onlarla yaralını həyata qaytaran insanlardan biri, cərrah həkim Anar Yusibov Xocalı faciəsi ilə bağlı fikirlərini açıqlayıb:

Xocalı heç vaxt yaddaşımızdan silinməyəcək faciədir. 1992-ci il fevralın 25-dən 26-na keçən gecə erməni silahlı birləşmələri Xocalı şəhərində dinc əhaliyə qarşı kütləvi qətliam törətdi. Uşaqlar, qadınlar və qocalar amansızcasına qətlə yetirildi. Bu soyqırım təkcə Azərbaycan xalqına deyil, bütün bəşəriyyətə qarşı törədilmiş bir cinayət idi. Dinc əhaliyə qarşı dünyada görünməmiş vəhşiliklər törədildi. Çoxda uzaq olmayan tarixdə törədilmiş bu soyqırımı sözlə ifadə etmək çətindir.

 Nəhayət II Qarabağ müharibəsindən sonra torpaqlarımızı azad etdik. Düşməndən qisasımızı aldıq. Bu gün digər ərazilərimiz kimi, Xocalı da azaddır. Orada dinc quruculuq işləri davam edir, xocalılar öz evlərinə qayıdırlar. Xocalı qatillərinin bəziləri bu gün məhkəmə qarşısındadır. Əminik ki, bütün cinayətkarlar gec-tez hüquq qarşısında  cavab verəcəklər.

Amma biz bu, faciəni, erməni faşizmini unutmadıq və heç zaman unutmayacayıq. Övladlarımızı, gələcək nəsilləri elə yetişdirməliyik, hazırlamalıyıq ki, onlar dostlarını, düşmənlərini hər zaman tanısınlar, insanlıq əleyhinə olan erməni vəhşiliyi bir daha təkrar olunmasın. Regionumuzda sabitlik olsun. Torpaqlarımızın işğaldan azad olunmasında böyük əməyi olan Ali Baş Komandanı, bütün əsgərlərimizi, qazilərimizi Allah qorusun deyirik. Şəhidlərimizi isə ehtiramla, rəhmətlə anırıq! 

Fact-info.az