Beynəlxalq münasibətlər sistemində sözü imzası qədər dəyərli olan Azərbaycanın müstəqilliyinin ilk illərində ölkəmizə təmənnasız, heç bir siyasi, iqtisadi və ya geosiyasi maraq gözləmədən dəstək verən ölkələrin sayı elə də çox deyildi. Bəzi ölkələrin dəstəyi daha çox qardaşlıq, dini və tarixi bağlılığa əsaslanıb və qarşılığında ciddi təmənna güdülməyib. Pakistan məhz həmin dövlətlərdəndir ki, hər zaman Azərbaycanla sıx əməkdaşlıqda maraqlı olub və bunu reallaşdırıb. Bu gün əminliklə Azərbaycan və Pakistan arasındakı mövcud olan sarsılmaz dostluğun və tarixi qardaşlıq münasibətlərinin qarşılıqlı hörmət və etimad prinsipləri əsasında daha da möhkəmləndiyini deyə bilərik.

 Fact-info.az-ın məlumatına görə, bu sözləri AZƏRTAC-a açıqlamasında Milli Məclisin deputatı Azər Allahverənov deyib.

O qeyd edib ki, bu gün Azərbaycan və Pakistan arasındakı siyasi, iqtisadi və humanitar əməkdaşlıq yüksək səviyyədədir. Xalqlar arasında əlaqələr uğurla inkişaf edir. Hər iki ölkənin dövlət başçıları, nazirləri və digər rəsmi nümayəndələri arasında mütəmadi səfərlər və görüşlər keçirilir. Beynəlxalq təşkilatlarda, o cümlədən Birləşmiş Millətlər Təşkilatı (BMT), İslam Əməkdaşlıq Təşkilatı (İƏT) və Qoşulmama Hərəkatında qarşılıqlı dəstək davam etdirilir. Azərbaycanın Pakistanın da üzv olduğu İqtisadi Əməkdaşlıq Təşkilatı (D-8) ailəsinə qoşulması digər üzv ölkələrlə ticarət, investisiya və iqtisadi əməkdaşlıq sahələrində yeni perspektivlər açıb.

A.Allahverənov müdafiə və hərbi sahədə əməkdaşlığın Azərbaycan və Pakistan münasibətlərinin mühüm istiqamətlərindən biri olduğuna diqqət çəkib: “Pakistan Azərbaycan ordusunun təlim və tədris proqramlarına daim dəstək verir, eyni zamanda, müdafiə sənayesində ekspert mübadiləsi həyata keçirilir. Azərbaycan Ordusunun zabitləri Pakistanın nüfuzlu hərbi akademiyalarında təhsil almaq və peşəkar biliklərini artırmaq imkanı qazanırlar. Xüsusilə Vətən müharibəsi zamanı Pakistan Azərbaycanın haqlı mövqeyini açıq şəkildə dəstəkləyib və qələbədən sonra rəsmi İslamabad Azərbaycanı təbrik edib. Azərbaycan və Pakistan arasındakı hərbi əməkdaşlıq strateji xarakter daşıyır və gələcəkdə daha da genişlənəcək. Bu əlaqələr hər iki ölkənin hərbi gücünü artırmaqla yanaşı, strateji müttəfiqliyi daha da möhkəmləndirəcək”.

Azərbaycan, Pakistan və Türkiyə arasında 2021-ci il iyulun 27-də imzalanan Bakı Bəyannaməsinin üçtərəfli əməkdaşlıqda yeni mərhələ açdığını deyən deputat Bəyannamənin hər üç ölkə üçün regional təhlükəsizlik, iqtisadi əməkdaşlıq və müdafiə sahəsində birgə fəaliyyəti gücləndirməyi hədəflədiyini bildirib.

“Prezident İlham Əliyev və Pakistanın Baş naziri Məhəmməd Şahbaz Şərif arasında münasibətlər hər zaman yüksək səviyyədə olub. Hər iki lider mütəmadi olaraq qarşılıqlı rəsmi səfərlər edir, beynəlxalq tədbirlərdə görüşlər keçirirlər. Elə Pakistanın Baş nazirinin bu günlərdə ölkəmizə səfəri də bunun bariz göstəricisidir”, - deyən deputat qeyd edib ki, Azərbaycan və Pakistan arasındakı münasibətlərin gələcəyi üçün geniş potensial mövcuddur. Xüsusilə enerji, ticarət, müdafiə sənayesi, turizm və təhsil sahələrində əməkdaşlığın daha da genişlənməsi üçün zəmin var.