Azərbaycan Qoşulmama Hərəkatına üzvlüyünün ilk günlərindən bu təsisatın qlobal miqyasda mövqelərinin gücləndirilməsinə çalışıb, təşəbbüsləri və praktik addımları ilə Hərəkatın institusional müstəvidə təşkilatlanmasına böyük töhfə verib. Ölkəmizin Qoşulmama Hərəkatına sədrliyi dönəmində isə bu proses daha da intensivləşib və təsisatın yaranma səbəbini ifadə edən “Bandunq prinsipləri”nin real məzmun almasına, üzv dövlətlər arasında daha ədalətli dünya düzəni naminə münasibətlərin intensivləşməsinə əlverişli zəmin yaranıb.

Fact-info.az-ın məlumatına görə, bu fikirləri AZƏRTAC-a açıqlamasında siyasi ekspert Elçin Mirzəbəyli səsləndirib.

Siyasi ekspertin sözlərinə görə, uzun illər boyu işğalla və işğalın himayə olunması faktı ilə qarşı-qarşıya qalan, beynəlxalq hüququn norma və prinsiplərinin bərqərar olması üçün mübarizə aparan, beynəlxalq təhlükəsizlik mexanizmlərinin böyük dövlətlərin geosiyasi maraqlarının toqquşması müstəvisində və həm də xaosa, özbaşınalığa yol açmaq üçün məqsədyönlü şəkildə sıradan çıxarıldığını, bütün bunların bəşəriyyəti uçuruma, sivilizasiyalararası qarşıdurmaya apardığını yaxşı başa düşən Azərbaycanın “Bandunq prinsipləri” təşviq etməsini, yalnız ölkəmizin üzləşdiyi ədalətsizliklə əlaqələndirmək doğru olmazdı. Azərbaycanın Qoşulmama Hərəkatı çərçivəsindəki genişmiqyaslı fəaliyyəti, təsisatın ayrı-ayrı strukturlarının yaradılması istiqamətində həyata keçirdiyi davamlı siyasət, istisnasız olaraq, qlobal məsuliyyətini dərk edən, bəşəriyyətin gələcəyinə ədalət prinsiplərinin bərqərar olması, beynəlxalq hüququn müstəqil subyektləri arasında bərabərhüquqlu münasibətlərin formalaşması müstəvisindən yanaşan, sistemli, geosiyasi proseslərin inkişaf perspektivini proqnozlaşdıra bilən strateji zəkanın obyektiv və reallığı əks etdirən qənaəti kimi qiymətləndirilməlidir.

“Hesab edirəm ki, Qoşulmama Hərəkatının “Qadınların hüquqlarının inkişaf etdirilməsi və səlahiyyətlərinin artırılması” mövzusunda Bakıda keçirilən konfransına və sözügedən tədbirin yekun bəyannaməsinə də məhz bu kontekstdən yanaşılmalıdır. Konfransın yekununda qəbul edilən Bakı Bəyannaməsində Qoşulmama Hərəkatının Qadınlar Platformasının yaradılması təklifinin nəzərə alınması, eləcə də Hərəkatın Koordinasiya Bürosu vasitəsilə bu təşəbbüsün, o cümlədən əlaqəli iş şəraitinin müzakirə edilməsinin vurğulanması, Azərbaycanın sözügedən təsisatın təşkilatlanması və fəaliyyətinin gücləndirilməsi istiqamətində irəli sürdüyü təşəbbüslərə verilən önəm və dəstək kimi qiymətləndirilməlidir. Xüsusilə qeyd etmək istəyirəm ki, Qoşulmama Hərəkatının Qadınlar Platformasının yaradılması Hərəkatın 62 illik tarixində təşkilatlanma istiqamətində atılan ikinci addımdır”, - deyə E.Mirzəbəyli vurğulayıb.

Siyasi ekspert bildirib ki, Qoşulmama Hərəkatının tarixində institutsional təşkilatlanma müstəvisində atılan ilk addım da, məhz Azərbaycanın sədrliyi dönəmində, Prezident İlham Əliyevin təşəbbüsü ilə baş tutub. Bundan öncə isə, yenə də Prezident İlham Əliyevin təşəbbüsü ilə Qoşulmama Hərəkatının və Birləşmiş Millətlər Təşkilatının tarixində bir ilkə imza atılmışdı. Hərəkatın çağırışı ilə BMT Baş Assambleyasının xüsusi iclası keçirilmiş, pandemiyaya qarşı birgə və ədalətli mübarizəni təşviq edən sənədin qəbuluna nail olunmuşdu.

Həmçinin siyasi ekspert deyib: “Bütün bunlar, ölkəmiz tərəfindən təkcə Qoşulmama Hərəkatının fəaliyyətinə deyil, bütövlükdə beynəlxalq münasibətlər sisteminə, bəşəriyyətin təhlükəsiz gələcəyinə verdiyi töhfədir. Çünki hazırda dünyada müharibə və münaqişələrə son qoyulmasının yeganə yolu Qoşulmama Hərəkatının söykəndiyi və ölkəmizin təşviq etdiyi prinsiplərə qeyd-şərtsiz əməl olunması, dövlətlərin ərazi bütövlüklərinə, suveren hüquqlarına hörmətlə yanaşılması, hüququn aliliyinə söykənən qarşılıqlı münasibətlərin təmin edilməsidir”.