Fact-info.az xəbər verir ki, bu fikirləri Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili martın 15-də “Azərbaycan Respublikasının Şəhərsalma və Tikinti Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə haqqında” Qanuna dəyişikliklə bağlı qanun layihəsinə münasibət bildirərkən deyib.

Bu sahədə ən mühüm çağırışlardan birinin məhz sənədləşmə ilə bağlı olduğunu vurğulayan Tahir Mirkişili bildirib ki, son vaxtlar evlərin, daşınmaz əmlakın sənədləşdirilməsi işində yumşalmalar tətbiq olunur. Belə ki, “Bir pəncərə” prinsipi tətbiq edilir, prosedurlar maksimum sadələşdirilir.

Qanun layihəsinin vətəndaşların mənzil-məişət şəraitinin yaxşılaşdırılmasına, insanların daşınmaz əmlaklarını sənədləşdirmək imkanı əldə edəcəyinə yönəldiyini qeyd edən komitə sədri Türkiyədə baş verən zəlzələdən sonra vətəndaşların təhlükəsizliyinə xüsusi önəm verildiyini vurğulayıb.

“2010-cu ildə Azərbaycanda Bakı və kəndlərin inkişafının II Dövlət Proqramının qeydiyyatı zamanı sənədsiz evlərlə bağlı problemlər meydana çıxdı və ondan iki il sonra bu məsələnin araşdırılması üçün komissiya yaradıldı. 2015-ci ildə Prezident İlham Əliyevin Fərmanı ilə 500 mindən çox ev qeydiyyata alındı. Layihədə 40 mindən çox kommersiya obyektinin sənədləşməsi və bu prosedurla bağlı dəyişikliklər öz əksini tapıb”, - deyə komitə sədri diqqətə çatdırıb.

Tahir Mirkişili qeyd edib ki, sənəddə birbaşa dövlət orqanlarına verilən göstərişlər öz əksini tapıb. O bildirib ki, çıxarış olmadığı halda daşınmaz əmlakı girov qoymaq mümkün deyil və yeni qanun layihəsi bu istiqamətdə öz müsbət rolunu oynayacaq.