Üzeyir Hacıbəylinin ev-muzeyində sənətşünaslıq üzrə fəlsəfə doktoru Səadət Təhmirazqızının Mədəniyyətşünaslıq üzrə Elmi-Metodiki Mərkəzin dəstəyi ilə çap olunmuş “Üzeyir Hacıbəyli müasirlərin düşüncəsində” kitabının təqdimat mərasimi keçirilib.

Kitaba dahi bəstəkar haqqında monoqrafiyalar, dissertasiyalar, tədqiqat əsərləri daxil edilib. Nəşrdə, həmçinin, Ü.Hacıbəyli haqqında tələbələrinin, həmkarlarının, onu yaxından tanıyan sənətkarların, ziyalıların xatirələri toplanıb. Kitabın “Ön söz”ündə S.Təhmirazqızı yazır: “XX əsrin mədəniyyət tarixinin inkişaf yoluna nəzər salanda, bu yolda Üzeyir Hacıbəylinin Azərbaycan mədəniyyətindəki müstəsna rolu bir daha görünür. O, Azərbaycan professional və klassik musiqi sənətinin banisi, Azərbaycan musiqişünaslıq məktəbinin yaradıcısı, dramaturq, publisist, ictimai xadim kimi fəaliyyəti ilə milli mədəniyyətimizi yüksək səviyyəyə çatdırmış və mədəniyyət tarixində silinməz izlər buraxmışdır”.

Təqdimat mərasimində Xalq artisti, Bakı Musiqi Akademiyasının rektoru Fərhad Bədəlbəyli, Üzeyir Hacıbəylinin ev-muzeyinin direktoru Sərdar Fərəcov, Xalq artisti Ramiz Quliyev, Mədəniyyətşünaslıq üzrə Elmi-Metodiki Mərkəzin direktoru Asif Usubəliyev, professor Vidadi Xəlilov, mədəniyyət və incəsənət xadimləri çıxış ediblər.