Konservatoriyanın və Təhsil Nazirliyinin birgə təşkilatçılığı ilə reallaşan konfrans AMK-nın xor kollektivinin ifasında Üzeyir Hacıbəylinin “Şəbi-hicran” kompozisiyası ilə açıq elan edilib.

AMK-nın rektoru, Xalq Artisti Siyavuş Kərimi çıxış edərək konfransın əhəmiyyətindən danışıb. Vurğulanıb ki, iki gün davam edəcək konfransda Azərbaycanla yanaşı, Türkiyə, Rusiya, ABŞ, Yaponiya, Özbəkistan və Qazaxıstandan olan etnomusiqişünaslar, musiqi tədrisi üzrə mütəxəssislər, professorlar, həmçinin bir sıra beynəlxalq ekspertlər iştirak edir. Belə beynəlxalq tədbirin iştirakçı ölkələr arasında mədəni yaxınlaşmaya xidmət etdiyini söyləyən ali təhsil ocağının rektoru konfransda “Musiqi ənənələrində qoruyucu mexanizmlər və funksional sistemlər”, “Musiqi ənənəsi mədəni mənsubiyyətin nişanı və rəmzi kimi”, “Etnomuisiqişünaslıqda müasir tədqiqat yanaşmaları”, “Milli musiqi ənənələri və müasir bəstəkar yaradıcılığının qarşılıqlı əlaqələri” və digər mövzularda məruzələr dinləniləcək. Sonra AMK-nın prorektoru, professor Lalə Hüseynova məruzə ilə çıxış edib.

Konfrans AMK-nın beynəlxalq əlaqələr departamentinin direktoru Cahangir Səlimxanovun moderatorluğu ilə plenar iclasla davam edib. Qeyd edək ki, konfrans çərçivəsində yerli və xarici musiqiçilərin konsert proqramı ilə çıxışı da nəzərdə tutulur.