Üzeyir Hacıbəylinin ev-muzeyində muzeyin təşəbbüsü və Mədəniyyət və Turizm Nazirliyinin dəstəyi ilə “Arşın mal alan-100” adlı kitab-kataloqun təqdimatı keçirilib.

AZƏRTAC xəbər verir ki, tədbirdə muzeyin direktoru, Əməkdar İncəsənət Xadimi Sərdar Fərəcov çıxış edərək “Arşın mal alan” operettasının 100 illik tarixini əks etdirən bu kataloqun bütövlükdə musiqisevərlər, xüsusilə Üzeyir Hacıbəyli yaradıcılığı ilə maraqlananlar üçün nəzərdə tutulduğunu vurğulayıb.

Bildirilib ki, kitabda ölməz əsərin yazılması ilə bağlı Ü.Hacıbəylinin xatirələri, qeydləri, əlyazmaları, müxtəlif teatrların afişaları, elanlar, dəvətnamələr, fotoşəkillər və s. materiallar toplanıb. Əsasən Ü.Hacıbəylinin ev-muzeyinin fondunda qorunub saxlanılan materiallardan istifadə olunub.

O, “Şərq-Qərb” nəşriyyatında yüksək poliqrafik keyfiyyətlə çapdan çıxan 3 yarımbaşlıq şəklində tərtib olunan kitabın oxucuda əsərin 100 illik tarixi barədə geniş təsəvvür yaradacağını vurğulayıb.

Tədbirdə Azərbaycan Bəstəkarlar İttifaqının sədri, Xalq Artisti Firəngiz Əlizadə, Əməkdar İncəsənət xadimləri Zemfira Qafarova, İmruz Əfəndiyeva, Hafiz Quliyev və başqaları Azərbaycan və dünya musiqi mədəniyyətinə böyük töhfələr vermiş Üzeyir Hacıbəylinin milli və bəşəri xarakterli yaradıcılığı ilə gələcəyə yeni yollar açan novator sənətkar olduğunu söyləyiblər. Vurğulanıb ki, onun hər bir əsəri musiqi həyatımızın xüsusi hadisəsinə, bayramına çevrilib, mədəni həyatımızda bir dönüş yaradıb.

Tədbir bəstəkarın əsərlərinin səslənməsi və rəngarəng musiqi nömrələrinin ifası ilə davam edib.