İyunun 21-dən 26-dək Macarıstanın paytaxtı Budapeşt şəhərində Azərbaycanın gənc qadın rəssamlarının əsərlərindən ibarət sərgi təşkil olunacaq. 
“Sönməz Məşəl” Mədəni Əlaqələr İctimai Birliyinin həyata keçirdiyi “Rənglərin səyahəti: Bakı-Budapeşt” adlı layihə çərçivəsində təşkil olunacaq sərginin maliyyə xərclərini Azərbaycan Respublikasının Prezidenti yanında Qeyri-hökumət Təşkilatlarına Dövlət Dəstəyi Şurası öz üzərinə götürüb.
Sərgidə gənc rəssamlar Nərminə Vəliyeva, Şəhla Qəhrəmanlı və Günay Həsənovanın əsərləri nümayiş ediləcək. 
Layihənin həyata keçirilməsində məqsəd Budapeşt ictimaiyyətini Azərbaycanın son illərdə qazandığı nailiyyətlərlə tanış etmək, ölkəmizin təbiət incilərini, memarlıq abidələrini, müasir inkişafını, nəhayət, doğma Qarabağın əsrarəngiz gözəlliklərini nümayiş etdirməkdir. Gənc rəssamların “Qarabağ atları”, “Xudafərin körpüsü”, “Musiqi beşiyimiz” və s. adlandırdıqları rəsmlər sərginin mahiyyəti barədə kifayət qədər aydın təsəvvür yaradır. 
“Sönməz Məşəl” Mədəni Əlaqələr İctimai Birliyinin sədri, Azərbaycan Dillər Universitetinin professoru Şəhla Nağıyeva əməkdaşımıza bildirib ki, layihənin reallaşdırılması üçün hazırlıq işləri başa çatmaq üzrədir. Artıq sərgidə nümayiş ediləcək əsərlər seçilib və qanunvericiliyin tələbinə uyğun olaraq ölkədən çıxarılmasına icazə almaq üçün müvafiq qurumlara təqdim olunub. 
Qeyd edək ki, “Sönməz Məşəl” Mədəni Əlaqələr İctimai Birliyi Azərbaycan Respublikasının Prezidenti yanında Qeyri-hökumət Təşkilatlarına Dövlət Dəstəyi Şurasının yardımı ilə Azərbaycan mədəniyyətinin və incəsənətinin, doğma Qarabağımızın gözəlliklərinin, bütövlükdə Azərbaycanın təbliği və tanıdılması məqsədinə xidmət edən maraqlı mədəniyyət layihələrini bundan əvvəl də dünyanın bir sıra iri şəhərlərində təşkil edib.