İntizarda qalıb Vətən

 

                                   İşlətdi yağı hiylə,

                                 Vətən, bağın talandı.    

                                 Ah-nalə  ərşə qalxdı,    

                                   Qəlblərdə od qalandı.
 

                                    Sinən sar tapdağında,

                                   Yağı səkir oylağında.

                                   Qəmli ötür sarı bülbül,

                                   Xəzan  vuran gül bağında.

 

                                   Oba köçüb, yurdu qalıb,

                                   Bayquş ular bucağında.

                                   Vüqarlı qəddi əyilib,

                                   Yox  daha dözüm dağında.
 

                                   Başın üstü çən-dumanlı,

                                   Fəsillərin hər çağında.

                                   Bağrın qandı ana torpaq,

                                   Didərgin el sorağında.

 

                                   Yol çəkir intizar gözüm,

                                   Dönəcəkmi el qoynuna?!

                                   Mehriban balası kimi

                                   Salacaqmı qol boynuna?!
 

                                   Yəqin bir gün çin olacaq

                                   Xəyal adlanan yuxular.

                                   Çıxacaq xalqın canından

                                   Qana hopan xof-qorxular.                                                                  

                                    

                      Çəkilsin qara əllər

                        Çəkilsin qara əli

                         Düşmənin torpağımdan.

                        Qurusun gözlərdə yaş,

                        Zövq alım növrağımdan.

                        Mavi bürünsün göylər

                        Doğsun, parlasın günəş.

                        Düşsün elə səs-səda,

                        Ürəkdə  yansın atəş.

                         Çalsın birlik nəğməsin,

                        Səslənsin tar-kaman, ud.

                        Toy-bayram ruhiyyəli

                        Büsat etsin ana yurd.

                         Nailə Süleymanlı