Son bir həftə ərzində Azərbaycanın bir sıra ölkələrdəki diplomatik nümayəndəliklərinə və aksiya keçirən dinc azərbaycanlılara qarşı radikal ermənilər tərəfindən təxribatlar törədilir. Bu təxribatlar özündə vandalizm və terror elementlərini ehtiva edir, cinayət məsuliyyəti doğuran əməllərdir.

Bu fikirləri AZƏRTAC-a açıqlamasında politoloq və siyasi ekspert Elxan Ələsgərov deyib.

O bildirib ki, Ermənistan silahlı qüvvələrinin dövlət sərhəddində yerləşən Azərbaycanın Tovuz rayonu istiqamətində hərbi təxribatına etiraz məqsədilə soydaşlarımız dünyanın bir çox ölkələrində, o cümlədən Fransa, Böyük Britaniya, İsveç, Polşa, Avstraliya, ABŞ, Niderland, Belçikada dinc aksiyalar təşkil ediblər. Bu aksiyaların keçirilməsində məqsəd düşmənin təxribatı ilə əlaqədar dünya ölkələrini məlumatlandırmaq və onların təcavüzkar hərəkətlərinə beynəlxalq müstəvidə hüquqi qiymət verilməsini tələb etməkdir. “Azərbaycan Ordusunun Ermənistanın son təxribatına cavabı düşməni məyus edib. Bu məğlubiyyət həm Ermənistanın daxilində, həm də xaricində siyasi hakimiyyətə qarşı narazılıq yaradıb. Bu səbəbdən soydaşlarımıza qarşı törədilən təxribatların hansı məqsədə xidmət etdiyini gözəl başa düşürük. Amma nə Ermənistan hökuməti, nə də erməni diasporu məqsədlərinə çata bilməyəcəklər”, - deyə politoloq vurğulayıb.

O qeyd edib ki, ABŞ-da və Belçikada ermənilərin təxribatları daha aydın şəkildə müşahidə edildi. Radikal qüvvələr tərəfindən çoxsaylı aksiya iştirakçılarına fiziki güc tətbiq olundu, onlara xəsarətlər yetirildi, sərbəst toplaşmaq və öz fikirlərini ifadə etmək hüquqları pozuldu. Belçikada keçirilən dinc aksiyada jurnalist xanıma xəsarət yetirildi. Düşünürəm ki, Ermənistan informasiya müharibəsində uduzduğunu dərk edərək bu yola əl atıb. Son illərdə Azərbaycan diasporunun fəallaşması və hətta erməni diasporunu üstələməsi onlarda qıcıq yaradıb və onlar bunu həzm etmək istəmirlər.

Ermənilər terror hərəkatında böyük ustalığa malik olduğunu diqqətə çatdıran ekspert ermənilərin bu tipli təxribatlarının, eləcə də terrorçu fəaliyyətlərinin yeni olmadığını deyib. Bildirib ki, tarixə nəzər salsaq görərik ki, 1970-1980-ci illərdə ASALA və digər erməni terror təşkilatları 70-dən çox insanı qətlə yetiriblər, ümumilikdə 22 ölkədə 235-dən çox terror aktı törədiblər, 24 türk diplomatını qətlə yetiriblər. Hazırda bu təxribatı törədənlərdə həmin terrorçuların övladlarıdır, onlardan törəyənlərdir.

Politoloq qeyd edib ki, bunu nəzərə alaraq Azərbaycanın diplomatik nümayəndəlikləri tərəfindən ehtiyat tədbirləri görülub, ermənilərin soydaşlarımıza gözlənilən təxribatı ilə bağlı yerli hakimiyyət orqanlarına məlumat verilib. Vyana Konvensiyasına əsasən, diplomatik nümayəndəliklərin hər hansı müdaxilə və zərərdən mühafizəsinin təmin edilməsi nümayəndəliyin yerləşdiyi ölkənin məsuliyyətindədir. Azərbaycanın diplomatik nümayəndəliklərinə və dinc aksiya iştirakçılarına qarşı törədilən bu təxribatların, vandalizm aktlarının qarşısı alınmalı, onların hərəkətinə hüquqi qiymət verilməlidir. ABŞ-da və Belçikada dinc aksiyada təxribat törədənlərin bir neçəsi həmin ölkələrin hüquq-mühafizə orqanları artıq tərəfindən saxlanılıb. Bu, davamlı olmalıdır.