Tarixin hər dövrünə baxdıqda ermənilərin təcavüzkar siyasəti ilə üzləşirik. Onlar hər zaman başqalarının torpaqlarından, xüsusilə türklərin ata-baba yurdlarından istifadə edərək özlərinə dövlət qurmağa çalışıblar. Hazırda Azərbaycan-Ermənistan dövlət sərhədinin Tovuz rayonu istiqamətində ermənilər tərəfindən törədilən təxribat da bu cəfəngiyatın bir hissəsidir. Ermənistan hökuməti bu addımla ölkədə yaranan xaosu, iqtisadi böhranı ört-basdır edərək əhalinin fikrini başqa bir istiqamətə yönəltməyə çalışır.

Bu sözləri AZƏRTAC-a müsahibəsində Türkiyənin “Can Azərbaycan” media şirkətinin təsisçisi və rəhbəri Namik Kamal Yıldırım bildirib.

Dünyanın COVID-19 pandemiyası ilə mübarizə apardığı bir dövrdə ermənilər tərəfindən atılan bu addımın Ermənistan hakimiyyətinin düşüncəsizliyinin növbəti nümayişi olduğunu deyən N.Kamal bildirib: “Başda Türkiyə Prezidenti Rəcəb Tayyib Ərdoğan olmaqla Xarici İşlər naziri Mövlud Çavuşoğlu, Müdafiə naziri Hulusi Akarın və bütünlüklə Türkiyə vətəndaşlarının qardaş Azərbaycana dəstək olması qürurvericidir. Bu ilk növbədə tarixi qardaşlıq əlaqələrinin və iki ölkə başçısı Rəcəb Tayyib Ərdoğan və İlham Əliyev arasındakı sıx dostluq münasibətlərinin təzahürüdür.

Tarixin bizə öyrətdiyi dərslərdən biri də yaxın keçmişdə yaşanan, nankor ermənilərin əsrlər boyu onları qoruyan Osmanlı İmperiyası və türk xalqına qarşı xəyanətdir. Ermənilər tərəfindən Şərqi Anadoluda və Azərbaycanda müsəlman və türk xalqlarına qarşı törədilən soyqırımı faktları isə tarixin qanlı səhifələrində öz əksini tapır. Bunlara müxtəlif zamanlarda öldürülən türk diplomatları, Azərbaycanın qədim Xocalı bölgəsində törədilən soyqırımını misal gətirmək olar. Bu hadisələr ört-basdır edilməyəcək qədər aşkardır. Son hadisələr gəldikdə isə Azərbaycan kimi qüdrətli bir dövlətin qarşısında ermənilərin tab gətirəcəyi düşüncələri absurddur. Bu hadisələr zamanı şəhid olan mərd Azərbaycan oğullarına Allahdan rəhmət, Azərbaycan xalqına başsağlığı diləyirəm”.