Azərbaycan Respublikasının Böyük Britaniyadakı səfiri Tahir Tağızadə Ermənistanın Azərbaycanla sərhəddə törətdiyi ən son təxribatlarla bağlı bu ölkənin çoxsaylı oxucu kütləsinə malik “The London Post” onlayn informasiya portalına müsahibə verib.

AZƏRTAC xəbər verir ki, səfir dünyanın pandemiya ilə mübarizə apardığı bir müddətdə Ermənistanın Azərbaycanla sərhəddə törətdiyi son təxribatları bu ölkənin işğal edilmiş Azərbaycan torpaqlarında son bir neçə aydakı təxribatlarının davamı olduğunu söyləyib.

Tahir Tağızadə qeyd edib ki, Ermənistanın son toqquşmaları başlatmaqda əsas məqsədi münaqişənin miqyasını daha da genişləndirmək və Azərbaycanı beynəlxalq sərhəddə hərbi əməliyyatlara təhrik etməklə üçüncü tərəfləri, o cümlədən üzv olduğu Kollektiv Təhlükəsizlik Müqaviləsi Təşkilatının üzvlərini özünün qondarma müdafiəsinə cəlb etməkdir.

Son hadisələrə Böyük Britaniyanın reaksiyası ilə bağlı suala cavab verərkən səfir T.Tağızadə bu xüsusda bu ölkənin Xarici İşlər Nazirliyinin tərəfləri nəticəyə yönəlmiş danışıqlara səsləyən və münaqişənin birdəfəlik həllinin tapılması zərurətini vurğulayan 14 iyul tarixli bəyanatını alqışladığını nəzərə çatdırıb. Səfir, həmçinin 13 iyul tarixində Britaniya Parlamentinin İcmalar Palatasında irəli sürülən və Ermənistanın Azərbaycana qarşı növbəti təcavüzünü qətiyyətlə pisləməyə, eləcə də BMT Təhlükəsizlik Şurasının müvafiq qətnamələrinin yerinə yetirilməsinə çağıran qətnamə sənədinə də diqqət çəkib. T.Tağızadə bir çox hallarda Azərbaycana qarşı qərəzli mövqe tutan bir sıra Britaniya KİV-lərinin son hadisələri işıqlandırarkən nisbətən obyektiv mövqe sərgiləməsini də müsbət dinamika kimi qiymətləndirib.

Müsahibəsində səfir Ermənistanın son məkrli addımlarına dünya ictimaiyyətinin reaksiyasının böyük əhəmiyyət daşıyacağını da xüsusi vurğulayıb. O qeyd edib ki, xüsusən Azərbaycanın Britaniya da daxil olmaqla Qərbdəki tərəfdaşları öz mövqelərini formalaşdırarkən işğalçı ilə işğala məruz qalan arasındakı fərqi ayırd etməlidir. ATƏT-in Minsk Qrupunun vasitəçiliyi ilə aparılan sülh danışıqlarına münasibət bildirərkən səfir əlavə edib ki, formal danışıqlardan substantiv və məqsədyönülü danışıqlara keçmək vaxtı çoxdan çatıb.