DQİDK-nın mətbuat xidmətindən AZƏRTAC-a bildiriblər ki, M.Qurbanlı qonaqlara ölkəmizdə mövcud olan dini durum və Komitənin fəaliyyəti barədə ətraflı məlumat verib. Azərbaycan əhalisinin 96 faizinin müsəlman olduğunu bildirən Komitə sədri ölkəmizdə müxtəlif dini konfessiyaların əsrlərdir sərbəst və qarşılıqlı anlaşma şəraitində fəaliyyət göstərdiklərini deyib. Bildirilib ki, pravoslav və katolik kilsələri, sinaqoqlar, Atəşgah məbədi – bütün bunlar Azərbaycanın mədəni irsinin tərkib hissəsidir. Dini konfessiyaların fəaliyyəti barədə geniş məlumat verən M.Qurbanlı yəhudilərin Azərbaycanda məskunlaşma tarixindən danışıb. O deyib ki, bütün dini qurumlara, o cümlədən qeyri-müsəlman icmalara dövlət tərəfindən mütəmadi maliyyə yardımı göstərilir.

Azərbaycanın dünyəvi dövlət olduğunu diqqətə çatdıran M.Qurbanlı dini tolerantlığın təbliği və radikalizmin qarşısının alınması ilə bağlı görülən işlər barədə danışıb. Komitə sədri tolerantlığın dövlət siyasətinin tərkib hissəsi olduğunu vurğulayaraq, 2016-cı ilin Azərbaycan Prezidenti İlham Əliyev tərəfindən “Multikulturalizm ili” elan edildiyini söyləyib və il ərzində həyata keçiriləcək layihələr barədə jurnalistlərə məlumat verib. O bildirib ki, Heydər Əliyev Fondu tərəfindən Azərbaycan tolerantlığının dünyaya tanıdılması istiqamətində “Tolerantlığın ünvanı- Azərbaycan” adlı layihə həyata keçirilir.

Qonaqlar səfər müddətində Azərbaycanın dinamik inkişafının, Avropa ölkələrindən fərqli olaraq burada yüksək səviyyəli multikultural mühitin mövcudluğunun şahidi olduqlarını deyiblər. Azərbaycanın həqiqətən də, tolerantlığın oazisi olduğunu qeyd edən jurnalistlər bu mühitin dünya ölkələri üçün nümunəyə çevriləcəyini bildiriblər.