“Dağlıq Qarabağ münaqişəsinin həlli ilə bağlı həmsədrlərin müxtəlif vaxtlarda hazırladıqları sənədlər var. Başqa sənədlər mövcud deyil”.
ANS PRESS-in məlumatına görə, bu sözləri Rusiyanın xarici işlər naziri Sergey Lavrov  keçirdiyi mətbuat konfransında deyib. 
Lavrov bildirib ki, bir neçə il ərzində təkmilləşdirilən bu sənədlər hazırda Dağlıq Qarabağ münaqişəsinin tənzimlənməsi üzrə sənədlər kimi nəzərdən keçirilir: "Heç bir sənəd Dağlıq Qarabağ münaqişəsinin bütün nüanslarının həllini təşkil etmir və Rusiya hər iki tərəfə münaqişənin sülh yolu ilə həllində kömək üçün səy göstərir".
Lavrov həmçinin bir müddət əvvəl onun hər hansı təkliflər irəli sürməsi barədə yayılan məlumatlara da aydınlıq gətirib. O bildirib ki, Dağlıq Qarabağ münaqişəsinin nizamlanması üzrə “Lavrovun” və ya digər şəxsin hazırladığı sənəd yoxdur.
Rusiyanın xarici işlər naziri Sergey Lavrovun mətbuat konfransı 
“Hazırlanan sənədlər ATƏT-ə göndərilsə də, münaqişənin həllinə heç bir təsir göstərməyib. Bu münaqişədə "ya hər şey, ya heç nə" prinsipi vacibdir. Tərəflər münaqişənin nizamlanması yollarının axtarışını davam etdirirlər. Biz tərəflərlə birlikdə yeni ideyalar axtarırıq”. 
Bir müddət əvvəl Sergey Lavrovun Ermənistan hakimiyyəti qarşısında 7 rayonun qaytarılması ilə bağlı məsələ qaldırdığı barədə xəbər yayılmışdı. Hətta məlumatlarda Lavrovun İrəvan səfərində də bu məsələni müzakirə etdiyi bildirilirdi. 
Sergey Lavrovun mətbuat konfransı
Amma yayılan məlumatlara aydınlıq gətirən Rusiyanın Ermənistandakı səfirliyi bildirmişdi ki, Dağlıq Qarabağ münaqişəsinin həlli ilə bağlı Ermənistan tərəfi ilə aparılan danışıqlar çərçivəsində hər hansı ərazinin güzəşt olunması ilə bağlı heç bir məsələ müzakirə olunmayıb.
Hazırda isə Qarabağ münaqişəsinin həlli ilə bağlı masada 2008-ci ildə qəbul edilən Madrid prinsipləri var. Bu plana uyğun olaraq Ermənistan qoşunlarını Dağlıq Qarabağ ətrafındakı rayonlardan çıxarmalı, daha sonra Dağlıq Qarabağın statusu barədə danışıqlar başlamalıdır. Amma Ermənistan hazırlanan planla razılaşmadığı üçün plan illərdir ki, sənəd olaraq qalır.