Azərbaycan xalçası 2010-cu il noyabrın 16-dan dünya mədəniyyətinin tərkibinə daxil edilib. Belə ki, Heydər Əliyev Fondunun prezidenti Mehriban xanım Əliyevanın təşəbbüsü ilə həmin tarixdə Azərbaycan xalçası UNESCO-nun Bəşəriyyətin Qeyri-Maddi Mədəni İrsinin Reprezentativ Siyahısına daxil edilib. Ona görə də qərara alınıb ki, hər il noyabrın 16-sı ölkəmizdə Xalça Günü kimi qeyd edilsin.

AZƏRTAC xəbər verir ki, bu sözləri noyabrın 16-da Azərbaycan Xalça Muzeyində Azərbaycan Xalçası Günü və görkəmli alim, xalçaçı rəssam Lətif Kərimovun doğum gününə həsr olunan “Zamanın elçisi xalça” adlı tədbirdə mədəniyyət müəssisəsinin direktoru, professor Röya Tağıyeva söyləyib.

Həm Röya Tağıyeva, həm də tədbirdə digər çıxış edənlər xalça sənətini yaşadanları bayram münasibətilə təbrik ediblər.

Sonra tədbir çərçivəsində muzeyin ekspozisiyasında “Tarix yazan xalçalar” adlı el sənətkarlarının toxuduğu xalçalardan, Lətif Kərimovun doğum gününə həsr olunmuş “Bir ömrün sehrli ilmələri” və L.Kərimovun sənətindən bəhrələnən Azərbaycan Dövlət Rəssamlıq Akademiyasının, Mədəniyyət və İncəsənət Universitetinin tələbələrinin və Humanitar Kollecin məzunlarının əsərlərinin “Sənəti yaşadanlar” adlı sərgilərin açılışı olub.  Daha sonra incəsənət ustalarının ifasında konsert proqramı təqdim olunub.