"Beynəlxalq Əlillər Cəmiyyəti" İB Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə "Qaçqın, məcburi köçkün, müharibə veteranları, əlil və sağlamlıq imkanları məhdud olan şəxslərin, məhbusların və ailə üzvlərinin problemlərinin həllinə dəstək" layihəsini həyata keçirir.

Layihə çərçivəsində ömrünün 40 ilini pedaqoji fəaliyyətə həsr etmiş 90 yaşlı Əsədova Bikə Oruc qızı "Beynəlxalq Əlillər Cəmiyyəti"nə rəsmi müraciət edib. Bikə Əsədovanın oğlu Ağdam rayonu özünümüdafiə batalyonunun əsgəri olmuş Yalçın Əsədov məlum Xocalı faciəsi zamanı ermənilər tərəfindən əsir götürülmüşdür. B. Əsədova hazırda Bakı şəhərində qızı ilə birgə kirayədə yaşayır.

İctimai Birliyin üzvləri Bikə Əsədovanın evində olublar, problemləri, mənzil şəraiti ilə maraqlanıblar. Bundan sonra şəhid anasının problemlərinin həlli üçün Əmək və Əhalinin Sosial Müdafiəsi Nazirliyinə müraciət edilib. Qısa zaman ərzində nazir Sahil Babayev İB-in sədri Tahir Xudiyevi və şəhid anası Bikə Əsədovanı qəbul edərək problemlərini dinləyib və qanun çərçivəsində lazımi köməklik göstəriləcəyini bildirib.