Onlar Əlil Təşkilatı İttifaqının fəaliyyətində nöqsanların olduğunu, üzvlərə qarşı ayrı seçkiliyin baş verdiyinə etirazlarını bildiriblər.

Müharibə, Əlil, Milli Qəhrəmanlar və Şəhid ailələrini təmsil edən bir qrup nüfuzlu təşkilatlar “Əlil Təşkilatları İttifaqı”nın rəhbərinin üzvlərinə qarşı etdiyi qeyri səmimi hərəkətləri və İttifaq daxilində “məxfi ittifaq”ın yaradılmasını qəbul etmədiyiklərini bildirərək “ittifaqdan” çıxdıqlarını bəyan ediblər.

Bəyanatı aşağıdakı təşkilatlar imzalayıblar:

1. Sərraf Orucov, "Beynəlmiləlçi Əlil Döyüşçülər" Fondunun prezidenti 2. Səmiyar Abdullayev, Azərbaycan Gözdən Əlillər Cəmiyyətinin sədri

3. Nəzakət Həsənova, “Şəhid Ailələrinə Maddi və Mənəvi Dəstək” İctimai Birliyinin sədri

4. Vahid Abbasov, “Aztəminatlı Əlil, Şəhid və MüharibəVeteranları Ailələrinə Kömək” Birliyinin sədri

5. Zaur Seyidzadə, “Valideyn Himayəsindən Məhrum Olan Uşaq və Gənclərə Yardım” İctimai Birliyinin sədri

6. Zaur Seyidzadə, “Zaur” Əlillərin Xeyriyyə İctimai Birliyinin sədri

7. Elşən Uluxanlı, Azərbaycan Respublikası Milli Qəhrəmanları Tanıtma İctimai Birliyinin sədri

8. Rövşən Ağamalıyev, Azərbaycan Respublikası Şəhid Ailələrinə Yardım və Hüquqların Müdafiəsi İctimai Birliyinin sədri

Qeyd edək ki, Azərbaycan Respublikası Əlil Təşkilatlar İttifaqı 47 QHT-nin birləşdiyi ən böyük koalisiyalardan biridir. Koalisiya rəsmi hüquqi statusa malikdir və ictimai birlik sayılır. Təşkilatın sədri Davud Rəhimlidir.

Xatırladaq ki, bu koalisiya ilə bağlı əsas narazılıqlar Əmək və Əhalinin Sosial Müdafiəsi Nazirliyi yanında İctimai Şuraya keçirilən son seçkilərdə meydana gəlib. Seçkidən sonra ittifaqın bir qrup üzvü olan QHT rəhbərləri Ittifaqın sədri Davud Rəhimlini qeyri səmimi olmaqda və onları aldatmaqda ittiham ediblər.