Özbəkistanın Nəvai şəhərində böyük özbək şairi Əlişir Nəvainin həyat və yaradıcılığı ilə əlaqədar "Əlişir Nəvai irsi və ümumbəşəri mənəvi dəyərlər" mövzusunda beynəlxalq konfrans keçirilib.

AZƏRTAC xəbər verir ki, tədbirdə Azərbaycan, Türkiyə, Özbəkistan, Qazaxıstan, Hindistan, Əfqanıstan, Pakistan və digər ölkələrin nəvaişünas alimləri iştirak edib. Konfransda Azərbaycan Milli Elmlər Akademiyası Dilçilik İnstitutunun direktoru, professor Möhsün Nağısoylu "Nəvai və klassik Azərbaycan ədəbiyyatı", həmin institutun əməkdaşı Elçin İbrahimov "Əlişir Nəvai və türk dünyası", AMEA Nizami Gəncəvi adına ədəbiyyat İnstitutunun şöbə müdiri, filologiya elmləri doktoru Almaz Ülvi Binnətova "Baburnamə"də Nəvai portreti", filologiya üzrə fəlsəfə doktoru Könül Rəhimova "Nəvai irsinin Kişvəri yaradıcılığına təsiri" və Bakı Dövlət Universitetinin professoru Ramiz Əsgər "Nəvainin Azərbaycanda öyrənilməsi, nəşri və tədrisi məsələləri" mövzularında məruzələr ediblər. Tədbirdə Əlişir Nəvainin irsi ilə bağlı digər ölkələrdən gələn alimlərin də məruzələri dinlənilib. Konfrans iştirakçıları qədim Buxara və Səmərqənd şəhərlərində də olublar.