Müdafiə Nazirliyi 2018-ci il üçün tədbirlər planına əsasən, yanvarda dövlət, yerli və xarici qeyri-hökumət təşkilatları, icra hakimiyyətləri, eləcə də ictimai qurumlarla birlikdə hərbi hissələrdə müxtəlif mövzularda tədbir və layihələr həyata keçirib. Nazirliyin təşkilatçılığı ilə Ağdam, Bərdə, Beyləqan, Tərtər, Xocavənd, Qusar, Füzuli, Bakının Yasamal və Qaradağ rayonları, o cümlədən Sumqayıt şəhər icra hakimiyyətləri ilə birgə cəbhəboyu zonada yerləşən hərbi hissələrdə, həmçinin xüsusi təyinatlı hərbi təhsil müəssisələrində hərbi-vətənpərvərlik mövzusunda 20-dək tədbir təşkil olunub, şəxsi heyətlə görüşlər keçirilib.

Nazirliyin mətbuat xidmətindən bildiriblər ki, 20 Yanvar - Ümumxalq Hüzn Günü, hərbi hissələrin yaradılmasının ildönümləri, Azərbaycanın Milli qəhrəmanlarının anım mərasimləri və digər tədbirlərdə şəxsi heyət, yerli ictimaiyyətin nümayəndələri, veteranlar, tələbələr yaxından iştirak ediblər.

Kütləvi informasiya vasitələrində dərc olunması məqsədilə yanvarda Müdafiə Nazirliyi tərəfindən 87 rəsmi məlumat, 53 foto, 8 videomaterial hazırlanıb, media nümayəndələrinin 9 sualı cavablandırılıb. Televiziya kanallarının cəbhəboyu zonada yerləşən hərbi hissələrdə çəkilişlər aparılması üçün iki icazə məktubu verilib. Müdafiə Nazirliyi tərəfindən təşkil edilən tədbirlərin işıqlandırılması üçün televiziya və informasiya agentlikləri 6 tədbirə dəvət olunublar.