AZƏRTAC xəbər verir ki, məqalədə sentyabrın 23-24-də Polşanın paytaxtı Varşavada ATƏT-in Demokratik Təsisatlar və İnsan Haqları Bürosunun təşkilatçılığı ilə keçirilən illik iclasda Sərhədsiz İnsan Haqları Təşkilatının rəhbəri Villi Fautrenin Ermənistanda insan hüquqlarının pozulması ilə bağlı hesabatına da yer verilib. Hesabatda qeyd edilir ki, müstəqil məhkəmə hakimiyyətinin olmaması Ermənistanda insan hüquqlarının ümumi vəziyyətinin pisləşməsinin nümunələrindən biridir.

Məqalədə bildirilir ki, Ermənistandakı təhlükəli faktlar bu ölkənin ombudsmanı, eləcə də BMT və Venesiya Komissiyası tərəfindən də qeydə alınıb. Varşavada keçirilən iclasdakı çıxışında Villi Fautre Ermənistanda insan hüquqları sahəsində fəaliyyət göstərən QHT-lərə istinadən deyib ki, bu ölkədə icra və məhkəmə hakimiyyətləri arasında asılılığın olması sistematik problemləri üzə çıxarır. Əsasən məhkəmə hakimiyyətinin müstəqil olmaması insan hüquqlarının pozulması hallarının kütləvi hal almasına gətirib çıxarır.