"Kür - Xəzər" xeyriyyə ictimai birliyinin dəvəti ilə  Azərbaycanda səfərdə olan Fransız jurnalisti, yazıçısı, Beynəlxalq Reyn Dərnəyinin prezidenti, qadın və uşaq hüquqlarının müdafiəçisi  Jerar Kardon və köməkçisi Fransuaz Nikolas Mətbuat Şurasında olublar.
 Səfər Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə həyata keçirilən  “Azərbaycan həqiqətləri Fransa mətbuatında” layihəsi çərçivəsində reallaşır.
Qonağı salamlayan MŞ sədri, Milli Məclisin deputatı Əflatun Amaşov onlara rəhbərlik etdiyi qurumun fəaliyyət istiqamətləri barədə geniş məlumat verib. O bildirib ki, Şura yalnız Azərbaycanda deyil, ümumən postsovet məkanında medianın ilk özünütənzimləmə qurumudur. Onun başlıca missiyası kütləvi informasiya vasitələri ilə bağlı şikayətlərin araşdırılmasından ibarətdir.
Qonaqları ölkəmizdə medianın hazırkı durumu ilə bağlı ətraflı məlumatlandıran Ə.Amaşov habelə söz və ifadə azadlığı məsələləri ətrafında müqayisələr aparıb. Qarşılıqlı fikir mübadiləsi şəraitində keçən görüşdə MŞ sədri Azərbaycanda media fəaliyyətinə, eləcə də Mətbuat Şurasının iş prinsiplərinə dair sualları da cavablandırıb."Kür - Xəzər" xeyriyyə ictimai birliyinin sədri Akif Kərimov səfər çərçivəsində keçirilən və planlaşdırılan görüşlər haqqında məlumat verərək, səfərin əsas məqsədinin Azərbaycan həqiqətlərinin:  Ermənistan-Azərbaycan Dağlıq Qarabağ münaqişəsi, qaçqın və məcburi köçkünlər ilə bağlı məsələlərin, Xocalı soyqırımının, Azərbaycanda multikulturalizm, tolerantlıq və birgə yaşayışın öyrənilməsi, Azərbaycanın sosial və iqtisadi inkişafı və digər məsələlər ilə bağlı vəziyyətin Fransa mətbuatında işıqlandırlmasından ibarət olduğunu bildirb.