“İkinci nəfəs” – ahıl və tənha vətəndaşlar üçün alternativ sosial xidmətlərin təşkili” layihəsinin yekunları ilə bağlı tədbir keçirilib

 Azərbaycan Milli QHT Forumunun Təlim və Resurs Mərkəzində “Ahıllara və Tənhalara Dəstək”  ictimai birliyi tərəfindən həyata keçirilən  ““İkinci nəfəs” – ahıl və tənha vətəndaşlar üçün alternativ sosial xidmətlərin təşkili” layihəsinin yekunları ilə bağlı tədbir keçirilib.

 Tədbiri giriş sözü ilə açan təşkilat rəhbəri Ruhiyyə Məmmədova bildirib ki, layihə Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə dəstəyi ilə 3 ay müddətində  reallaşıb.

 Layihə çərçivəsində ahıl və tənha vətəndaşlar üçün Azərbaycanın dilbər güşələrindən olan Quba rayonuna istirahət turu təşkil olunub,  Azərbaycan Yazıçılar Birliyinin və Azərbaycan Jurnalistlər Birliyinin üzvü, “Səməd Vurğun” və “Qızıl qələm” mükafatları laureatı, şair-dramaturq Zaməddin Ziyadoğlunun “Ömür növrağı” kitabının təqdimatı mərasimi keçirilib,  eyni zamanda 3 ahıl vətəndaş üçün doğum günü tədbirləri təşkil olunub.

 Təşkilat rəhbəri eyni zamanda bildirib ki, bununla yanaşı bu qəbildən olan insanların müxtəlif problemlərinin həllinə yardım edilib. Beləki onların müayinələrinin aparılması, xüsusi tipli dövlət müəssisələrinə yerləşdirilməsi və s. fəaliyyətlər həyata keçirilib.

 Daha sonra layihə çərçivəsində keçirilən tədbirlər haqqında video təqdimat iştirakçılara təqdim olunub.

 Tədbirdə iştirak edən və layihə benefisinatlarından olan şair-dramaturq Zaməddin Ziyadoğlu, Zakir Əliyev, Ənvər  Əhmədov,  Lider TV-nin əməkdaşı Elçin Quliyev, QHT rəhbərlərindən Mehriban Abdullayeva  Taleh Əliyev, Naibə Behbudova,  Sevda Əhədova,  Xədicə Mikayılova, Bəsti Nəsibova, Nailə İsmayılova, Cəmilə Abdulova, Tahirə Nağıyeva, Cəsarət Hüseynzadə və digərləri layihənin əhəmiyyətindən danışaraq, bu istiqamətdə görüləcək işlərlə bağlı təkliflərini bildiriblər.