Bu gün biz bütöv Azərbaycan deyə bilirik. Bu söz sadəcə bir ifadə deyil, xalqımızın tarixi mübarizəsinin, şəhidlərimizin müqəddəs qanının, qazilərimizin fədakarlığının və Ali Baş Komandanımız Prezident İlham Əliyevin müdrik siyasətinin nəticəsidir. Bu sevinci yaşamaq xalqımız üçün ən böyük xoşbəxtlikdir.

Artıq yüzlərlə ailə doğma torpaqlarına qayıdaraq öz yurdlarında xoşbəxt həyat qurur. Məktəblərdə körpə fidanlar “Ana Vətən” sözlərini yazır, Himnimizi uca səslə oxuyur. Universitet tələbələri fəxrlə “Biz Qarabağda təhsil alırıq” deyirlər. Bu səhnələr Azərbaycanın dirçəlişinin canlı sübutudur, xalqımızın gələcəyinə yazılmış ümid dolu bir səhifədir.

Qarabağda quruculuq işləri sürətlə davam edir. Hər köçən ailə bir ümidin, bir sevincin təcəssümüdür. Mən də bir vətəndaş olaraq bu tarixi dönüşün şahidiyəm. Torpaqlarımız azad olunandan sonra doğma Xocavənd rayonuna gəldim, əlimdən gələni etmək üçün. Ən böyük arzum öz evimin Xocavənddə olmasıdır. İnşallah bu arzum gerçəyə çevriləcək və mən doğma yurdumda ocağımı yandıracağam.

Bu gün Azərbaycan çiçəklənmə dövrünü yaşayır. Hər addımda dirçəlişin nəfəsi duyulur, hər səsdə qələbənin əks-sədası eşidilir. Qarabağın dağlarında azadlıq nəğməsi səslənir, Xocavəndin yollarında ümid addımları eşidilir. Hər tikilən ev bir ümid işığıdır, hər açılan məktəb bir gələcək qapısıdır. Şəhidlərin ruhu bu torpaqlarda əbədi yaşayır, qazilərin fədakarlığı xalqımızın yaddaşında silinməz iz qoyur.

Azərbaycan Respublikası bu gün gücün, iradənin və birliyin simvoludur. Prezident İlham Əliyevin rəhbərliyi ilə xalqımız öz taleyini yazır, gələcəyini qurur. Bu gələcək işıqlı, möhkəm və əbədi olacaq. Bu gələcəkdə hər bir azərbaycanlı öz yurdunun işığında, öz torpağının nəfəsində yaşayacaq.

Yaşasın Azərbaycan!
Yaşasın xalqımızın birliyi!
Yaşasın Prezidentimiz İlham Əliyev!

Həsənov Səbuhi Nazim oğlu