Laçın Beynəlxalq Film Festivalının (Lachin International Film Festival – LIFF) mükafatlandırma mərasimi olub.

Fact-info.az xəbər verir ki, mərasimdə festivalın direktoru Amil Amal tərəfindən qaliblərə və fərqlənən iştirakçılara mükafatlar təqdim edilib.

Festival çərçivəsində Laçın rayonunda Azərbaycan Respublikası Prezidentinin xüsusi nümayəndəsi Məsim Məmmədova, Xalq artisti Şamil Süleymanlıya, Elşad Ərşadoğluya və İlkin Umarova “Qızıl Palıd Budağı” mükafatı təqdim olunub. “Golden Oak Branch” mükafatına Jean-Marie Villeneuve, Toktobek Usonov Usonovich layiq görülüblər.

Mükafatlar, həmçinin cəmiyyətin aktual məsələlərinin kino dili ilə ifadəsinə, kino aktyoru sənətinin inkişafındakı xidmətlərə və digər kateqoriyalara görə verilib.

Münsiflər heyətinin xüsusi diqqətini çəkən filmlər sırasında Ayan Məlikin “Laylay”, aktyor Anar Buludun “Timşel”, Asiman Ağa Rövşənin “Divarın o üzü”, Mehmet Oğuz Yıldırımın “Kudret”, Kübra Binnətovanın “Eyni yağış altında”, İqor Smolanın “It lives under the snow”, Marcin Tomaszewskinin “Karma. The line between”, Rezanın “Aşıqlar çayxanası”, Zeljko Stanetiçin “Milena”, Nodir Nuriddinoviç Abdukarimovun “Cold Spring” filmləri yer alıb.

Bundan əlavə festivalın müsabiqə proqramına seçilən bütün 39 filmin iştirakçılarına “Rəsmi iştirakçı” sertifikatı təqdim olunub. Ümumilikdə 17 nəfər mükafata layiq görülüb.

Laçın Beynəlxalq Film Festivalı Qarabağda və Şərqi Zəngəzurda keçirilən ilk beynəlxalq film festivalıdır. Festivalın əsas məqsədi Azərbaycan kinosunun təbliği, yerli və xarici kino nümayəndələri arasında yaradıcılıq əlaqələrinin genişləndirilməsi, eləcə də regionun mədəni həyatının canlandırılmasına töhfə verməkdir.