Süni intellektin sürətli inkişafı yaxın illərdə ABŞ əmək bazarını ciddi şəkildə dəyişdirə və milyonlarla iş yerini risk altında qoya bilər.

Bu barədə “Microsoft” şirkətinin həmtəsisçisi Bill Qeyts şəxsi internet səhifəsində yayımladığı məqaləsində bildirib.

O qeyd edib ki, süni intellekt əvvəlki texnoloji inqilablarla müqayisədə iqtisadiyyatı daha sürətlə dəyişdirir. Onun sözlərinə görə, texnologiyanın inkişaf tempi ağlasığmaz dərəcədə sürətlidir və əmək bazarında baş verəcək dəyişikliklərə hazırlaşmaq üçün daha az vaxt qalır.

Bill Qeytsin fikrincə, süni intellekt yaxın onillik ərzində hüquq, müştəri xidmətləri, tibb, proqram təminatı və istehsalat kimi sahələrdə bir sıra işləri öz üzərinə götürəcək. Yeni iş yerlərinin yaranması gözlənilsə də, lazımi siyasət tədbirləri görülmədiyi halda onların sayı hazırda mövcud olan iş yerlərindən xeyli az ola bilər.

Qeyts bildirib ki, texnologiyanın məntiqi düşünmə və problemləri həll etmə imkanları inkişaf etdikcə insanın zehni əməyinə daha ciddi rəqibə çevrilir.

“Microsoft”un həmtəsisçisi hesab edir ki, ən böyük dəyişiklik süni intellektin demək olar ki, səhvsiz nəticələr təqdim edə bildiyi mərhələdə baş verəcək. Belə olan halda şirkətlər iqtisadi baxımdan bir sıra işləri insan əvəzinə süni intellektə həvalə etməyə maraqlı ola bilərlər.

Bill Qeyts, həmçinin süni intellektin artıq ofis və digər zehni əməyə əsaslanan peşələrə təsir göstərdiyini qeyd edib. Şirkətlərin məlumatların təhlili kimi tapşırıqları süni intellektə həvalə etməsi insan əməyinə tələbatı azalda bilər. O, xüsusilə əmək bazarına yeni daxil olan gənclər üçün iş imkanlarının azalmasından narahatlığını bildirib.

Qeytsin fikrincə, risk yalnız ofis işləri ilə məhdudlaşmır. O, süni intellektlə idarə olunan “ağıllı” robotların yaxın illərdə fiziki əməyin müəyyən növlərini də insanlarla rəqabət aparacaq səviyyədə yerinə yetirə biləcəyini düşünür. Onun proqnozuna görə, onilliyin sonunadək tikinti və xidmət sektorlarında bəzi fiziki işlərdə robotlar insanlarla rəqabət aparmağa başlaya bilər.

Bill Qeyts süni intellektin yaratdığı çağırışlar qarşısında təhsil, peşə hazırlığı və yeni bacarıqların formalaşdırılmasının mühüm əhəmiyyət daşıdığını vurğulayıb.