“Son illərdə Çin Xalq Respublikasının Sədri Si Cinpin və Azərbaycan Respublikasının Prezidenti İlham Əliyevin strateji rəhbərliyi ilə Çin-Azərbaycan münasibətləri hərtərəfli şəkildə inkişaf edərək yeni mərhələyə qədəm qoyub, hərtərəfli strateji tərəfdaşlıq səviyyəsinə yüksəlib”.

Fact-info.az xəbər verir ki, bunu ÇXR-in  Azərbaycandakı səfiri Lu Mey “İrs Keşikçisi” sənədli filminin Azərbaycan dilində təqdimatı zamanı deyib.

Səfir bildirib ki, bununla da, iki ölkə arasında əməkdaşlığın inkişafında yeni tarixi səhifə açılıb.

“Hazırda Çin və Azərbaycan arasında yüksək səviyyəli qarşılıqlı səfərlərin sayı artır, əlaqələr getdikcə genişlənir, siyasi qarşılıqlı etimad daim möhkəmlənir, “Bir Kəmər, Bir Yol” təşəbbüsünün birgə həyata keçirilməsi çərçivəsində mühüm və məhsuldar nəticələr əldə olunur, ikitərəfli ticarət dövriyyəsi isə dəfələrlə yeni rekord göstəricilərə çatır. İki ölkə xalqlarının bir-birinin ölkəsi və mədəni irsi ilə daha yaxından tanış olmaq istəyi getdikcə güclənir”, - diplomat söyləyib.

O əlavə edib ki, gələcəyə nəzər saldıqda, Çin və Azərbaycan arasında müxtəlif sahələrdə humanitar mübadilə və əməkdaşlıq üçün geniş perspektivlər mövcuddur və bu istiqamətdə böyük potensial var:

“Çin tərəfi Azərbaycan tərəfi ilə birlikdə iki ölkə dövlət başçılarının əldə etdiyi mühüm razılaşmaları rəhbər tutaraq, Qlobal Sivilizasiya Təşəbbüsünü fəal şəkildə həyata keçirməyə, sivilizasiyalararası qarşılıqlı öyrənmə və dostluq ənənələrini inkişaf etdirməyə, xalqlar arasında qarşılıqlı anlaşma və əməkdaşlıq əsasında Çin-Azərbaycan münasibətlərinin yeni səhifəsini birgə yazmağa hazırdır”