Avqustun 5-də Azərbaycan elminin və ali təhsilinin tanınmış nümayəndələrindən biri, tarix elmləri namizədi, dosent Məmmədağa Ələkbər oğlu Baxışovun anadan olmasının 70 ili tamam olur.

 Məmmədağa Baxışov 1956-cı il avqustun 5-də Kürdəmir rayonunun Dəyirmanlı kəndində anadan olmuşdur. Orta təhsilini Kürdəmir şəhər 1 nömrəli orta məktəbdə başa vurduqdan sonra 1973-cü ildə Azərbaycan Dövlət Universitetinin Tarix fakültəsinə daxil olmuş, 1978-ci ildə həmin ali məktəbi fərqlənmə diplomu ilə bitirmişdir.

 Əmək fəaliyyətinə tarix müəllimi kimi başlayan Məmmədağa Baxışov 1979–1983-cü illərdə Kürdəmir rayonunun Qarasaqqal və Köhnəbazar kənd orta məktəblərində gənc nəslin təlim-tərbiyəsi ilə məşğul olmuşdur. 1983-cü ildən Bakı Dövlət Universitetinin Avropa və Amerika ölkələrinin yeni və müasir tarixi kafedrasında fəaliyyət göstərir. Uzun illərdir ki, dosent kimi universitetdə yüzlərlə tələbənin yetişməsində mühüm rol oynayır.

 Elmi fəaliyyətə böyük maraq göstərən alim 1992-ci ildə "Azərbaycanın xarici ölkələrlə iqtisadi əlaqələri (1970–80-ci illər)" mövzusunda namizədlik dissertasiyasını uğurla müdafiə edərək tarix elmləri namizədi alimlik dərəcəsi almışdır. Onun elmi araşdırmaları əsasən beynəlxalq münasibətlər, Avropa və Amerika ölkələrinin yeni və müasir tarixi, eləcə də Avropa İttifaqının beynəlxalq münasibətlər sistemində yeri kimi aktual istiqamətləri əhatə edir.

 Məmmədağa Baxışov beynəlxalq münasibətlər və dünya tarixi sahəsində respublikanın tanınmış mütəxəssislərindəndir. O, çoxsaylı monoqrafiyaların, dərsliklərin, dərs vəsaitlərinin, metodik göstərişlərin və elmi məqalələrin müəllifidir. Onun nəşr olunmuş elmi əsərləri uzun illərdir ali məktəblərdə müəllim və tələbələrin etibarlı müraciət etdiyi mənbələr sırasında yer alır.

 Alim yalnız elmi fəaliyyəti ilə deyil, həm də yüksək insani keyfiyyətləri, sadəliyi, xeyirxahlığı və tələbələrə qayğıkeş münasibəti ilə seçilir. Uzun illər Bakı Dövlət Universitetinin ictimai həyatında fəal iştirak etmiş, həmkarlarının və tələbələrinin dərin hörmətini qazanmışdır. Xüsusilə rayonlardan gələn tələbələrə göstərdiyi diqqət və dəstək onun nəcib xarakterinin parlaq ifadəsidir.

 70 illik mənalı ömür yolu, məhsuldar elmi-pedaqoji fəaliyyəti ilə Azərbaycan təhsilinə və tarix elminə sanballı töhfələr vermiş dosent Məmmədağa Baxışovu yubileyi münasibətilə səmimi-qəlbdən təbrik edir, ona möhkəm cansağlığı, uzun ömür, ailə səadəti, yeni elmi nailiyyətlər və uğurlar arzulayırıq.

 Nuralı İsmayılov