Azərbaycan Respublikasının sabiq maliyyə naziri, iqtisad elmləri doktoru, professor, Əməkdar müəllim, tanınmış ictimai xadim və dəyərli ziyalımız Əvəz Əkbər oğlu Ələkbərovu anadan olmasının ildönümü münasibətilə səmimi qəlbdən təbrik edirik!

Əvəz müəllim müstəqil Azərbaycan dövlətinin quruculuğunda, elmin inkişafında və cəmiyyətin mənəvi-ictimai həyatında dərin iz qoymuş bir şəxsiyyətdir. Ulu Öndər Heydər Əliyevin etimadı ilə Maliyyə Naziri və Dövlət Sosial Müdafiə Fondunun sədri kimi məsul vəzifələrdə çalışaraq ölkəmizin maliyyə-büdcə və sosial müdafiə sisteminin bünövrəsini qoymuşdur. İlk Vergi Məcəlləsi, Büdcə sistemi haqqında qanun və Sosial sığorta haqqında qanun kimi strateji sənədlərin hazırlanmasına rəhbərlik etmiş, beynəlxalq arenada (BMT, BVF, İslam İnkişaf Bankı və s.) Azərbaycanı ləyaqətlə təmsil edərək BMT-nin "Sülh səfiri" adına layiq görülmüşdür.

Onlarla elmi əsərin, fundamental monoqrafiyaların, dərsliklərin və çoxsaylı məqalələrin müəllifi olan Əvəz Ələkbərov bu gün də Azərbaycan Dövlət İqtisad Universitetində Maliyyə və audit kafedrasının müdiri və "Professorlar Klubu" Rəyasət Heyətinin sədri kimi gənc iqtisadçıların, alimlərin yetişməsinə böyük töhfələr verir. Təhsil sahəsindəki müstəsna xidmətləri Əməkdar müəllim fəxri adı və "Heydər Əliyevin 100 illiyi (1923–2023)" yubiley medalı ilə qiymətləndirilmişdir.

Qərbi Azərbaycan İcması Ağsaqqallar Şurasının üzvü və Çəmbərək Rayon İcmasının sədri kimi doğma dədə-baba torpaqlarımızın tarixi həqiqətlərinin yaşadılmasında, soydaşlarımızın həmrəyliyinin möhkəmlənməsində və milli-mənəvi dəyərlərimizin qorunmasında böyük fədakarlıq göstərir.

Öz dərin zəkası, yüksək mədəniyyəti, prinsipial mövqeyi və təvazökarlığı ilə hər zaman cəmiyyətdə böyük hörmət və nüfuz qazanmış, gənc nəsil üçün əsl həyat məktəbi olmuşdur.

Hörmətli Əvəz müəllim! Sizi ad gününüz münasibətilə bir daha təbrik edir, sizə möhkəm cansağlığı, uzun ömür, ailə səadəti, dövlətimiz, elmimiz və el-obamız naminə yorulmaz fəaliyyətinizdə yeni-yeni uğurlar arzulayırıq! Ömrünüzün yeni yaşı mübarək və düşərli olsun!