Polad ağa İbrahimovun 19 yaşı var. Həm istedadlı ssenarist, həm rejissor, həm də bacarıqlı təşkilatçıdır. O, 2 il öncə Əbədi Tədbirlər Birliyi layihəsini yaradıb.Ətrafına özü kimi istedadlı gəncləri toplayıb.Dəfələrlə Müdafiə Nazirliyinin tərkibindəki hərbi hissə və taborlarda maraqlı tədbirlər keçirib. Bu günlərdə onun yazdığı ssenari əsasında şəhidlərin ömür yolundan bəhs edən "Cənnətdəki 4 ağac" tamaşası səhnələşdirilib. 

İyulun 18-də Şuşa Dövlət Dram Teatrında həmin tamaşaya baxış keçirildi. Azərbaycanın Dövlət Himni səsləndirildi, şəhidlərin xatirəsi 1 dəqiqəlik sükutla yad olundu.

Əsasən yeniyetmə və gənclərdən ibarət komanda Ölkəmizin ərazi bütövlüyünün bərpası uğrunda gedən savaş zamanı şəhid olmuş Vəfa Dəmirçioğlu, Tural Qarayev, Zaur İsmayılzadə və şəhid polis əməkdaşı Seyfi Abdullayev obrazını canlandırdılar.

Həqiqətən də Polad ağa bəy başda olmaqla bütün heyətin fəaliyyəti alqışlanmalıdır.

Tamaşanın nümayişindən sonra çıxış edən "Xocalı Soyqırımını Tanıtma" ictimai birliyinin sədri Şamil Sabiroğlu, "Müharibə Veteranı Qadınlarına Sosial Dəstək" ictimai birliyinin sədri Radə Abbas, jurnalistlər-Zərəngiz Qayalı, Jalə Cəfərova, Aybəniz Qafarlı, 44gunsavash.az saytının baş redaktoru, yazıçı - publisist Mövsümağa Ədalətoğlu, şəhid Tural Qarayevin anası Səmayə Qarayeva, şəhid Zaur İsmayılzadənin anası, müharibə veteranı Sevil Hüseynova, şəhid Seyfi Abdullayevin anası Şövqiyyə Abdullayeva çıxış edərək Polad ağa İbrahimovun rəhbərliyi altında fəaliyyət göstərən kollektivə ən xoş arzularını bildirdilər.

Sonda tamaşada çıxış edən aktyorlara "Xocalı Soyqırımını Tanıtma" ictimai birliyi adından Təşəkkürnamə təqdim edildi.