Azərbaycan Respublikasının QHT-lərə Dövlət Dəstəyi Agentliyinin dəstəyi ilə “Muğan Düzü” SİİB tərəfindən həyata keçirilən "Muğan bölgəsində kooperativ təsərrüfatının yaradılmasına dəstək" layihəsi çərçivəsində 16.07.2026-cı il tarixində Saatlı rayonunun Kamallı kəndində maarifləndirici seminar keçirilib.

Seminarda 18 nəfər kiçik pay torpaq sahibi iştirak edib. Tədbiri layihə rəhbəri V. Quliyev açaraq layihənin məqsədi barədə məlumat verib.

Layihənin eksperti A. Adilov, DAİM-in aqronomu V. Baxşəliyev bildirib ki, əsas məqsəd daha çox torpaq əkmək deyil, mövcud torpaq sahələrindən yüksək məhsuldarlıq əldə etməkdir. Bunun üçün torpağın düzgün becərilməsi, aqrokimyəvi analizlər, iqlimə uyğun toxum seçimi, düzgün suvarma, məhsulun istehsalı və bazara çıxarılması vacibdir. Kiçik pay torpaq sahiblərinin bu işləri təkbaşına görməsi çətin olduğundan onların kooperativ və kəndli-fermer təsərrüfatlarında birləşməsi vacibdir.

Seminarda bildirilib ki, 2026–2030-cu illər üçün Dövlət Proqramı kiçik torpaq sahiblərinin kooperativ və ailə kəndli-fermer təsərrüfatlarında birləşməsini təşviq edir. Ən azı 5 hektar sahədə yaradılacaq təsərrüfatlar istehsal xərclərini azaldacaq, məhsuldarlığı artıracaq və bazara çıxışı genişləndirəcək. Layihə rəhbəri Dövlət Proqramının məqsədləri, kooperativlərin əhəmiyyəti, tələb olunan sənədlər və qeydiyyat qaydaları barədə məlumat verib. 5–6 hektar torpaq payına malik torpaq sahibləri kooperativ yaratmağa maraq göstəriblər.

İştirakçılar torpaq paylarının müxtəlif ərazilərdə yerləşməsinin vahid təsərrüfat yaratmağa mane olduğunu bildirərək, torpaq paylarının könüllü razılıq əsasında bir-biri ilə dəyişdirilməsi üçün konsolidasiya mexanizminin yaradılmasını təklif ediblər. Bu mexanizmin 5 hektar və daha böyük kooperativ təsərrüfatlarının yaradılmasına, məhsuldarlığın və kənd əhalisinin gəlirlərinin artmasına töhfə verəcəyi qeyd olunub.

Sonda iştirakçılar layihəyə göstərilən dəstəyə görə QHT-lərə Dövlət Dəstəyi Agentliyinə təşəkkürlərini bildiriblər.