Xəzər rayonu Şağan qəsəbəsində doğulub boya-başa çatan və müharibədə tarix yazan Natiq Məmmədbəylinin valideynləri ilə söhbət etdim. Heç zaman unudulmayacaq övlad itkisini, acısını yaşamaq çətin olsa da, şəhidlərimizin xatirəsinin əbədiləşdirilməsi öncə valideynləri üçün böyük təsəllidir.

Digər tərəfdən qaliblərin xatirəsini əbədiləşdirmək, şəhidlərimizin həyat hekayətini yazmaq şükürdür. Hər zaman düşünmüşəm ki, II Qarabağ müharibəsində qazilərimizin, şəhidlərimizin şücaəti hesabına qazanılmış tarixi qələbə yüksək mənəviyyatın qazancıdır. Belə qazanc heç bir məkrli qüvvə tərəfindən israf olunmadan millətin, dövlətin strateji hədəflərinə yönəlməlidir. Müasir gəncliyə örnək ola biləcək şəhidlərimizlə bağlı o müqəddəs missiya hər zaman davam etməlidir.

Digər bir sevindirici xəbər eşitdim ki, Natiq Məmmədbəylinin də adına küçə veriləcək. Bu məlumatı mənə şəhidimizin valideynləri çatdırdılar.

İndi Azərbaycanda bir çox dəyərli, qəhrəman insanların adını daşıyan xeyli küçələr var. Bu küçələr həm də bizim ömür yolumuzdur. Gələcək nəsillərin ömür yoludur–Şağandakı Natiq Məmmədbəyli küçəsi kimi. Biz bu yolları qürurla, həm də ləyaqətlə keçməliyik. Belə yollar, belə küçələr zəngin xatirələri, qürurlu keçmişi özündə yaşadacaq tarixdir. Bu tarix həm bu günə, həm də gələcəyə boylanır.

Onu da qeyd edək ki, bu gün şəhid Natiq Məmmədbəylinin doğum günüdür. Məkanı cənnət olsun. Bütün şəhidlərimizi ehtiramla anırıq!

Əkrəm Bəydəmirli