1922-ci il iyunun 7-də Kürdəmir şəhərində dünyaya göz açan Teymur İsmiyev ömrü boyu doğulduğu yurdun adını ləyaqətlə təmsil etmiş, zəngin fəaliyyəti ilə Azərbaycan hüquq elminin və vəkillik institutunun inkişafına mühüm töhfələr vermişdir. Kürdəmir torpağının yetişdirdiyi ziyalılardan biri kimi o, peşəkarlığı, prinsipial mövqeyi və dövlətə sədaqəti ilə yadda qalmışdır.

      Orta təhsilini başa vurduqdan sonra II Dünya müharibəsinin ağır illərində Vətənin müdafiəsinə yollanan Teymur İsmiyev cəbhədə göstərdiyi xidmətlərə görə bir sıra orden və medallarla təltif olunmuşdur. Müharibədən sonra isə ali hüquq təhsili alaraq həyatını hüquq sahəsinə həsr etmiş, uzun illər ərzində vəkil, alim və hüquqşünas kimi səmərəli fəaliyyət göstərmişdir.

      Moskva Dövlət Hüquq İnstitutunda təhsil alan Teymur İsmiyev hüquq elmi sahəsində də məhsuldar fəaliyyət göstərərək elmi araşdırmalar aparmış, hüquqi düşüncənin inkişafına öz töhfəsini vermişdir. Onun peşəkar fəaliyyəti dövlət tərəfindən yüksək qiymətləndirilmiş, Azərbaycan Respublikasının Əməkdar hüquqşünası fəxri adına layiq görülmüşdür.

      Teymur İsmiyev həm müharibə veteranı, həm də hüquq sahəsinin nüfuzlu nümayəndəsi kimi cəmiyyət arasında böyük hörmət qazanmışdır. O, 2005-ci ildə vəfat etsə də, zəngin irsi və peşəkar fəaliyyəti Azərbaycan hüquq tarixində özünəməxsus yer tutur.

      Bu əlamətdar gündə Kürdəmirin yetirdiyi görkəmli ziyalılardan biri olan Teymur İsmiyevin əziz xatirəsini ehtiramla yad edir, onun ölkəmizin hüquq sisteminin inkişafı və gənc hüquqşünasların formalaşması istiqamətində xidmətlərini minnətdarlıqla xatırlayırıq.

      Doğma Kürdəmirin yetişdirdiyi belə şəxsiyyətlər regionun zəngin intellektual irsinin, vətənpərvərlik ənənələrinin və milli dəyərlərinin parlaq təcəssümüdür. Teymur İsmiyevin həyat yolu bugünkü və gələcək nəsillər üçün Vətənə sədaqətin, elmə bağlılığın və peşəkarlığın nümunəsi olaraq yaşayacaq.

Tədqiqatçı Nuralı İsmayılov