Birləşmiş Millətlər Təşkilatının Ətraf Mühit Proqramının (UNEP) icraçı direktoru İnger Andersen Azərbaycana səfəri zamanı ölkənin ekoloji problemlərin həllinə töhfə verməyə çalışan gənclərinin liderlik keyfiyyətlərini və fəallığını yüksək qiymətləndirib.

İnger Andersen bu barədə rəsmi sosial şəbəkə hesabında paylaşım edib.

UNEP rəhbəri bildirib ki, dünyanın müxtəlif ölkələrinə səfərləri zamanı onu ən çox təsirləndirən məqamlardan biri ətraf mühit sahəsində fəaliyyət göstərən gənclərin qətiyyəti və enerjisidir.

“Harada oluramsa olum, bir məqam həmişə diqqətimi cəlb edir: Ümumi ekoloji çağırışlarımızın həlli üçün əzm və qətiyyət nümayiş etdirən gənclərin liderliyi, məsuliyyəti və enerjisi”, – deyə o vurğulayıb.

İnger Andersen qeyd edib ki, Bakıda keçirilən Ümumdünya Ətraf Mühit Günü çərçivəsində müxtəlif sahələri təmsil edən gənclərlə görüş keçirib. Onun sözlərinə görə, görüş zamanı iqlim fəaliyyəti sahəsində mövcud çağırışlar və gənc nəslin gələcəyinin qorunmasına xidmət edən həll yolları müzakirə olunub.

UNEP-in icraçı direktoru görüşün Yanar Dağ ərazisində keçirilməsinin ona xüsusi təəssürat bağışladığını da qeyd edib.

“Bakıya bir neçə dəfə səfər etsəm də, nəhayət, “Yanardağ”ı ziyarət etmək və bu əbədi alovları öz gözlərimlə görmək məni çox sevindirdi”, – deyə İnger Andersen bildirib.

O, müxtəlif ixtisaslara yiyələnən gənclərin arzuları, ümidləri və qətiyyətinin söhbət zamanı aydın hiss olunduğunu vurğulayıb.

“Sürətlə dəyişən və daim tələsən dünyada belə anlar xüsusi dəyər daşıyır”, – deyə UNEP rəhbəri əlavə edib.

İnger Andersen sonda görüşün təşkilinə görə IDEA İctimai Birliyinə təşəkkürünü bildirib.