Tural Yadulla oğlu Eyyubov 2 iyul 1992-ci ildə Kürdəmir rayonunun Mollakənd kəndində dünyaya göz açmışdır. Uşaqlıq illərinin bir hissəsini ailəsi ilə birlikdə Rusiyada keçirmiş, ibtidai təhsilini orada almışdır. 2005-ci ildə Vətənə qayıdaraq Bakı şəhəri Nəsimi rayonundakı 240 nömrəli tam orta məktəbdə təhsilini davam etdirmiş, 2009-cu ildə məktəbi bitirmişdir.

Həmin il Bakı Dövlət Universitetinin Tətbiqi riyaziyyat fakültəsinə daxil olmuş və 2013-cü ildə ali təhsilini uğurla başa vurmuşdur.

Ali təhsilini bitirdikdən sonra hərbi xidmətə yollanan Tural Eyyubov 2013–2014-cü illərdə müddətli həqiqi hərbi xidmət keçmiş, daha sonra Azərbaycan Ordusunda müddətdən artıq həqiqi hərbi xidmətini davam etdirərək leytenant hərbi rütbəsinə yüksəlmişdir. O, xidmət etdiyi bütün dövrlərdə peşəkarlığı, nizam-intizamı və Vətənə sonsuz sevgisi ilə seçilmişdir.

Tural Eyyubovun vətənpərvərliyi yalnız hərbi xidmətində deyil, şəxsi həyatında da öz əksini tapmışdı. O, ailə qurduğu gün toy mərasiminə Azərbaycan Dövlət Bayrağına bürünərək daxil olmuş, Vətən sevgisini həyatının ən xoş günündə də nümayiş etdirmişdi. Bu görüntü sonralar onun həyat yolunun rəmzinə çevrildi.

2020-ci il sentyabrın 27-də başlayan Vətən müharibəsinin ilk günlərindən döyüşlərə qatılan leytenant Tural Eyyubov Füzuli və Xocavənd istiqamətlərində gedən ağır döyüşlərdə böyük şücaət göstərmişdir. O, ərazi bütövlüyümüzün bərpası uğrunda aparılan döyüşlərdə komandir kimi üzərinə düşən vəzifələri layiqincə yerinə yetirmiş, şəxsi igidliyi ilə silahdaşlarına nümunə olmuşdur.

25 oktyabr 2020-ci ildə Füzuli uğrunda gedən döyüşlər zamanı qəhrəmancasına şəhid olmuşdur. Şəhid leytenant doğulduğu Kürdəmir rayonunda böyük ehtiramla dəfn edilmişdir. Toyunda Azərbaycan bayrağına bürünən Tural Eyyubov son mənzilə də üçrəngli Dövlət Bayrağına sarılı vəziyyətdə yola salınmışdır. Bu, onun ömrünün Vətən sevgisi ilə başlayıb Vətən sevgisi ilə başa çatmasının rəmzi oldu.

Azərbaycan Respublikasının Prezidenti İlham Əliyevin sərəncamları ilə leytenant Tural Eyyubov ölümündən sonra "Vətən uğrunda", "Füzulinin azad olunmasına görə", "Xocavəndin azad olunmasına görə" və "Şuşanın azad olunmasına görə" medalları ilə təltif edilmişdir.

Tural Yadulla oğlu Eyyubov öz şərəfli ömrü, yüksək mənəvi keyfiyyətləri və qəhrəmanlığı ilə Azərbaycanın igid zabitləri sırasında əbədi yaşayacaq. Onun əziz xatirəsi Kürdəmir camaatının, Azərbaycan xalqının və gələcək nəsillərin yaddaşında daim ehtiramla anılacaq.

Tədqiqatçı Nuralı İsmayılov