"Xəzər dənizi Azərbaycanın ekoloji təhlükəsizliyinin, iqtisadi inkişafının və təbii irsinin ayrılmaz hissəsidir. Bu gün iqlim dəyişikliklərinin təsiri nəticəsində Xəzər dənizində müşahidə olunan səviyyə enməsi təkcə ekoloji problem kimi yox, həm də sosial-iqtisadi və regional təhlükəsizlik məsələsi kimi qiymətləndirilməlidir. Ona görə də Xəzərin gələcəyi ilə bağlı beynəlxalq səviyyədə aparılan müzakirələr xüsusi əhəmiyyət daşıyır və məsələnin qlobal iqlim gündəliyində saxlanılması olduqca vacibdir".

Bu fikirləri Milli Məclisin deputatı Fatma Yıldırım deyib: "Bu baxımdan Almaniyanın Bonn şəhərində keçirilən və Xəzər dənizinin gələcəyinə həsr olunan yüksəksəviyyəli panel müzakirələrini olduqca əhəmiyyətli hesab edirəm. Təqdirəlayiq haldır ki, bu mühüm tədbir Leyla Əliyevanın təşəbbüsü və dəstəyi ilə həyata keçirilib, məsələ beynəlxalq iqlim gündəliyinin mühüm mövzularından biri kimi təqdim olunub. Leyla Əliyevanın uzun illərdir ətraf mühitin qorunması, biomüxtəlifliyin mühafizəsi və ekoloji maarifləndirmə sahəsində həyata keçirdiyi fəaliyyət ölkəmizdə və beynəlxalq müstəvidə yüksək qiymətləndirilir. Xüsusilə IDEA İctimai Birliyi tərəfindən reallaşdırılan layihələr cəmiyyətimizdə təbiətə məsuliyyətli münasibətin formalaşmasına mühüm töhfə verir.

Panel müzakirələrində Xəzər dənizinin səviyyəsinin azalmasının ekoloji, sosial və iqtisadi nəticələrinin geniş şəkildə müzakirə olunması, müxtəlif ölkələrdən olan ekspertlərin və beynəlxalq təşkilatların nümayəndələrinin bu mövzu ətrafında fikir mübadiləsi aparması problemin həllinə yeni yanaşmaların formalaşdırılması baxımından xüsusi önəm daşıyır.

Hesab edirəm ki, Xəzərlə bağlı məsələlər yalnız sahilyanı dövlətlərin problemi kimi qiymətləndirilməməli, qlobal iqlim dəyişikliklərinin yaratdığı təsirlərin bir hissəsi kimi nəzərdən keçirilməlidir. Bu istiqamətdə beynəlxalq əməkdaşlığın gücləndirilməsi, elmi araşdırmaların genişləndirilməsi və birgə fəaliyyət mexanizmlərinin yaradılması vacibdir.

Azərbaycan Respublikasının Prezidenti cənab İlham Əliyevin rəhbərliyi ilə ölkəmizdə ətraf mühitin qorunması, yaşıl inkişaf və iqlim dəyişiklikləri ilə mübarizə sahəsində həyata keçirilən siyasət artıq beynəlxalq səviyyədə nümunə kimi dəyərləndirilir. COP29-a ev sahibliyi etmiş Azərbaycanın bu gün də qlobal ekoloji gündəliyin formalaşmasına fəal töhfə verməsi qürurvericidir. İnanıram ki, Bonn müzakirələri Xəzər dənizinin qorunması istiqamətində yeni əməkdaşlıqların qurulmasına, elmi əsaslı qərarların qəbuluna və gələcək nəsillər üçün bu nadir təbii sərvətin mühafizəsinə mühüm töhfə verəcək".