Vətən anlayışı bizim üçün hər zaman müqəddəs  olub və dərin məna kəsb edir. Heç şübhəsiz, Allah qatında ən üstün seçilmişlər – şəhidlər müjdələnib. Həm də şəhidlik  elə bir məktəbdir ki, mərdliyi, cəsurluğu, qorxmazlığı, igidliyi, məqamı çatdıqda Vətənin müdafiəsi uğrunda canından keçməyin nə olduğunu insanlığa, bütün bəşəriyyətə təqdim edə bilir.

Şəhidlər ölmür – Allah-Təalanın Qurani-Kərimdə buyurduğu kimi... şəhidlik ən ali məqamdır. Belə ali məqama yetişənlərdən biri Mübariz Kamilov oldu.

Kamilov Mübariz  İbadət oğlu 1987-ci ilin  may ayının 29-da  Xəzər rayonunun Qala  qəsəbəsində doğulub. 185 saylı məktəbdə təhsil alıb. Orta məktəbi bitirdikdən sonra Naxçıvanda həqiqi hərbi xidmətdə olub. Məsuliyyətli, peşəkar hərbçi olan  Kamilov Mübariz hər zaman hərbi hissə komandirlərinin, hərbi xidmət yoldaşlarının rəğbətini qazanıb. Qüsursuz xidmət keçən  Mübariz hərbi tapşırıqları yerinə yetirən zaman düşmənin basdırdığı tank əleyhinə minaya düşərək şəhid olub.  2007-ci ildə  doğulub boya başa çatdığı Qala  qəsəbəsində dəfn olunub. Mübariz Kamilov Vətənə, torpağa bağlı  hərbçi, millətini sevən insan olaraq,  hər zaman onu tanıyanların qəlbində yaşayacaq.

Kamilov Mübariz hərbi xidməti başa vurmağına sayılı günlər qalan zaman Şəhidlik zirvəsinə yüksəlib. Məkanı cənnət olsun. O, Azərbaycanın tarixində, taleyində şərəfli  yer tutan qəhrəman olaraq hər zaman rəhmətlə, ehtiramla anılacaq.  

Qəddar düşmən üzərində qazandığımız tarixi Zəfərə,  son 200 illik işğala son qoyub, bizə qələbə sevincini yaşatdığına, millət olaraq bizi  bütövləşdirdiyinə görə, Şəhidlərimizə hər zaman borcluyuq!

Şəhid Kamilov Mübariz İbadət oğluna həsr olunan sənədli  filmi təqdim edirik.

Fact-info.az