Azərbaycan Xalq Cümhuriyyətində  təmsil olunan fədakar insanlar mümkün olmayanı mümkünə çeviriblər. Azərbaycan  müstəqilliyə nail olmaqla, 114 min kv. km ərazini dünyaya tanıtmaqla müasir dövlətçiliyimizin əsasını qoyub.

Mayın 28-də Azərbaycan Xalq Cümhuriyyətinin yaradılmasının 108-cı ildönümü tamam olur. 1918-ci il mayın 28-də Azərbaycan Xalq Cümhuriyyətinin Milli Şurası İstiqlal Bəyannaməsini imzalamaqla Azərbaycanın müstəqilliyini dünyaya bəyan edərək xalqımızın çoxəsrlik dövlətçilik ənənələrini davam etdirib. Cümhuriyyət müstəqil, azad, demokratik respublika qurmaq məqsədini qarşıya qoymuşdu. 28 May –Müstəqillik Günü xalqımız üçün ən dəyərli və müqəddəs bayramlardan biridir. Hər bir Azərbaycan vətəndaşı bu tarixi qürur hissi ilə qeyd edir. 

44 günlük Vətən müharibəsinin iştirakçısı,  tanınmış cərrah Anar Yusibov bu şərəfli tariximizə nəzər salır:

 “Mən orta və ali məktəbdə təhsil aldığım dövrdə tariximizi oxuyub öyrənməyə çalışmışam.  Azərbaycan Xalq Cümhuriyyətinin şərəfli tarixi ilə tanış olmuşam. Bu tarixi biz heç zaman unutmamalıyıq.  İlk Bəyannaməsini Məhəmməd Əmin Rəsulzadənin başçılığı ilə Tiflisdə élan edən bu, cümhuriyyət sonra Gəncəyə köçüb. Tarixdən məlumdur ki, bu insanlar çox ağır şəraitdə çalışıblar. Bakı işğalçılardan azad edildikdən sonra bütün hakimiyyət paytaxtda cəmləşib.  AXC-nin ömrü qısa  olsa da, çox fədakarlıqla çalışıblar. 23 ay ərzində bu insanlar əzmlə  çalışaraq Şərqdə ilk demokratik  dövlət qurublar. Bütün sahələrdə dövlət quruculuğu işləri aparılıb.  Amma işğalçı qüvvələr milli hakimiyyətin fəaliyyətini qəbul edə bilmədilər. Beləliklə, Xalq Cümhuriyyəti süqut edib. 

Amma  70 ildən sonra,  1991-ci ildə Azərbaycan yenidən müstəqilliyinə qovuşdu. Bu gün biz Cümhuriyyət qurucularına borcluyuq.  Əgər o zaman  Xalq Cümhuriyyəti qurulmasaydı, bu gün Azərbaycan digər bir ölkənin vilayəti kimi qala bilərdi, müstəqil ola bilməzdi. Ona görə, biz fədakar, millətsevər   Cümhuriyyət qurucularını ehtiramla anırıq. Həmin liderlərin ideyaları gerçəkləşdi. Ümummilli Lider Heydər Əliyevin rəhbərliyi ilə Azərbaycan müstəqilliyini möhkəmləndirdi. Prezident İlham Əliyevin rəhbərliyi ilə Azərbaycan ərazi bütövlüyünü, suverenliyini bərpa etdi. Biz  müstəqilliyimizin əbədi olduğunu dərk edirik. Azərbaycanın ərazi bütövlüyü  təmin edilib. Cümhuriyyət qurucuları məhz bunu arzulayırdılar. Torpaqlarımızın, Vətənimizin azadlığı uğrunda Şəhid olmuş bütün qəhrəmanlarımızı ehtiramla anırıq.

   Fact-info.az