Mayın 20-də Bakıda Qlobal Cənub Gənclər Platformasının birinci rəsmi iclası keçirilib.

Fact-info.az xəbər verir ki, dekolonizasiya hərəkatı və qlobal gənclər əməkdaşlığı kontekstində mühüm əhəmiyyət kəsb edən tədbirin yekununda platformanın gələcək fəaliyyət istiqamətlərini müəyyən edən rəsmi sənəd qəbul olunub.

İclasda qəbul edilən qərarlara əsasən, platformaya daha 4 yeni ölkə və dənizaşırı ərazi rəsmən daxil olub. Bununla da Qlobal Cənub Gənclər Platformasının ümumi üzvlərinin sayı 20-yə yüksəlib. Təşkilata yeni qəbul edilən subyektlər Bonayre, Sent-Martin, Seneqal və Misirdir.

Qəbul olunmuş sənəddə platformanın daha geniş beynəlxalq iştirakçılıq və aktiv cəlbedicilik mexanizmləri vasitəsilə coğrafiyasını gələcəkdə də genişləndirmək niyyəti ifadə olunub.

Birinci rəsmi iclas çərçivəsində iştirakçılar qurumun əsas prioritetlərini bəyan ediblər. Qərarlarda üzv ölkələrin və dənizaşırı ərazilərin maraqlarını, prioritetlərini və gələcək istəklərini effektiv şəkildə müdafiə edəcək funksional, praktiki addımların atılmasının vacibliyi vurğulanıb.

Eyni zamanda, üzv dövlətlərin gəncləri arasında əməkdaşlıq mexanizmlərinin gücləndirilməsi və bu əlaqələrin institusionallaşdırılması istiqamətində növbəti mərhələdə atılacaq konkret addımlar müəyyən edilib.

Platformanın qarşıdakı fəaliyyət planında beynəlxalq təşkilatlar, çoxtərəfli qlobal təsisatlar və vətəndaş cəmiyyəti subyektləri ilə sıx tərəfdaşlığın qurulması əsas hədəf kimi müəyyənləşdirilib. Bu strateji əməkdaşlığın platformanın beynəlxalq miqyasda nüfuzunun və görünürlüğünün artırılmasına, qlobal qərarvermə proseslərində gənclərin iştirak payının genişləndirilməsinə, habelə birgə beynəlxalq layihələrin icrasına birbaşa töhfə verəcəyi gözlənilir.

Bakı iclasının yekun sənədi Qlobal Cənub gənclərinin dekolonizasiya prosesində və beynəlxalq həmrəyliyin gücləndirilməsində yeni bir mərhələnin əsasını qoyub.