İstanbulda Azərbaycan Rəssamlar İttifaqının üzvü, xalq yaradıcılığı həvəskarı Elnarə Rəsulovanın “Motivin yaddaşı: Azərbaycan xalçalarının üzərində gizlənən izlər” mövzusunda sərgisinin rəsmi açılış mərasimi olub.

 İstanbulun Yıldız Texnik Universitetinin (YTÜ) tarixi Sancak Köşkündə açılan sərgi bu ali təhsil müəssisəsinin tələbəsi, “Xarıbülbül” Azərbaycan Mədəniyyət Birliyinin sərgilər üzrə məsul nümayəndəsi Aylin Axundovanın kuratorluğu ilə baş tutub.

Tədbirdə YTÜ-nün rektoru professor Eyüp Debik, Türkiyə-Azərbaycan Dərnəkləri Federasiyasının (TADEF) sədrinin müşaviri Pərviz Məmmədzadə, Türkiyənin hakim Ədalət və İnkişaf Partiyasının (AK Parti) İstanbul üzrə sədrliyi, partiyanın türk dövlətləri ilə əlaqələr bölməsinin üzvləri, “Xarıbülbül” Azərbaycan Mədəniyyət Birliyinin Kamalə Kamal Cabbarova və digərləri iştirak ediblər.

Mərasimdə çıxış edən Aylin Axundova sərginin açılmasında göstərdiyi dəstəyə görə universitetin rəhbərliyinə, TADEF və təmsil etdiyi birliyə təşəkkürünü ifadə edib.

Azərbaycan xalısının sadəcə toxuma sənəti deyil, üzərindəki naxışlar, rəngləri və təkrarlanan motivləri ilə bir xalqın yaddaşını yaşadan tarixi vasitə olduğunu bildirən A.Axundova deyib: “Xalçaçılıq sənəti bəzən qoruyucu bir işarəyə, bəzən bərəkət arzusuna, bəzən isə keçmişdən bu günə gəlib çatan səssiz bir hekayəyə çevrilir. Universitetimizin İncəsənət və dizayn fakültəsinin sənət və mədəniyyət idarəçiliyi bölməsinin tələbələri tərəfindən hazırlanan sərgi də Azərbaycan xalça sənətini məhz bu yaddaş üzərindən təqdim edir. Təşkil olunduğu tarixi məkanın ab-havası ilə vəhdətdə olan sərgi sənətsevərləri Azərbaycan xalçalarının zəngin mədəni dünyasına daha yaxından baxmağa dəvət edir”.

Digər çıxışçılar da bu kimi tədbirlərin Azərbaycan incəsənətinin dünyada təmsili, xüsusilə gələcək nəsillərə çatdırılması baxımından əhəmiyyətini vurğulayıblar.

Sərgidə Elnarə Rəsulovanın şəxsi kolleksiyasından nadir sənət nümunələri, eləcə də İstanbulda ilk dəfə olaraq Azərbaycan xalçalarının rəqəmsal proyeksiya ilə təqdimatı yer alır. Burada “30 il sonra…”, “Ərciman”, “Təbriz” və “Quba” mövzusunda əsərlər, habelə müəllifə məxsus müxtəlif antik xalça kolleksiyalarından seçilmiş qiymətli parçalar ekspozisiyanın əsas hissəsini təşkil edir.

Bu sərgi Azərbaycan xalça sənətinin zəngin estetik yaddaşını müasir təqdimat dili ilə birləşdirərək ziyarətçilərə fərqli vizual təcrübə nümayiş etdirir. Rəng harmoniyası, milli ornamentlər və tarixi motivlərin vəhdəti sərginin əsas bədii xəttini formalaşdırır.