“Kolonial Ədalətsizliklər və Mənzil Çatışmazlığı” mövzusunda beynəlxalq konfrans iştirakçıları Azərbaycanı WUF13-ün uğurlu təşkili və beynəlxalq şəhərsalma dialoqu və əməkdaşlığına verdiyi mühüm töhfəyə görə təbrik edib.

Bu barədə Bakı Təşəbbüs Qrupunun bəyanatında deyilir.

“Yeni Şəhər Gündəliyi və Dayanıqlı İnkişaf Məqsədi 11-in prinsip və məqsədlərinə uyğun olaraq, hər kəs üçün inklüziv, təhlükəsiz, dayanıqlı və davamlı şəhərlərin və yaşayış məskənlərinin təmin edilməsinin vacibliyini bir daha təsdiqləyirik. Fransa, Niderland Krallığı tərəfindən idarə olunan ərazilər, eləcə də keçmiş Belçika koloniyaları və Hindistandakı etnik azlıqlar daxil olmaqla, kolonial və neokolonial idarəetmə strukturlarının təsirinə məruz qalan dənizaşırı ərazilərdə və regionlarda yaşayan insanların qarşılaşdıqları davamlı mənzil və şəhərsalma problemləri ilə bağlı narahatlığımızı ifadə edirik. Bu kontekstlərin bir çoxunda tarixi və müasir kolonial idarəetmə formaları ilə əlaqəli struktur bərabərsizliklər adekvat mənzilə, torpağa, ictimai infrastruktura və əsas xidmətlərə çıxışa mənfi təsir göstərməkdə davam edir.

Mayot, Yeni Kaledoniya, Qvadelupa və Martinika kimi ərazilərdəki vəziyyət xüsusi narahatlıq doğurur. Bu ərazilərdə yerli icmalar mənzil çatışmazlığı, sanitariya, içməli suya çıxış, qeyri-bərabər infrastruktur inkişafı və təhlükəli yaşayış şəraiti ilə bağlı ciddi problemlərlə üzləşməyə davam edirlər. Yeni Kaledoniyada şəhərsalma ilə bağlı məsələlər torpaq hüquqları və Kanak xalqının tarixi narazılıqları ilə sıx bağlı olaraq qalır”, - bəyanatda qeyd olunub.

Eləcə də, Karib hövzəsindəki Bonaire, Aruba, Kurasao və Sint-Marten daxil olmaqla Niderland Krallığının yurisdiksiyasında olan digər ərazilərdə də oxşar sosial-iqtisadi və şəhərsalma problemləri vurğulanıb.

Bildirilib ki, məhdud torpaq ehtiyatları, turizmlə bağlı artan təzyiqlər, yüksələn mənzil qiymətləri, miqrasiya ilə əlaqəli yük və qeyri-bərabər inkişaf modelləri bu ərazilərdə yerli əhali və həssas icmalara qeyri-mütənasib şəkildə təsir göstərməkdə davam edir: "Vurğulayırıq ki, dənizaşırı ərazilərdə və digər təsirlənmiş regionlarda mövcud olan mənzil problemlərinə yalnız texniki və ya iqtisadi çərçivədən yanaşılmamalıdır. Bu problemlər həm də davam edən kolonial irs, struktur bərabərsizliklər və yerli əhalinin şəhərsalma və ərazi inkişafı ilə bağlı qərarqəbuletmə proseslərində məhdud iştirakı kontekstində qiymətləndirilməlidir.

Bu baxımdan, yerli xalqların, etnik azlıqların və yerli icmaların şəhər idarəçiliyi proseslərində, o cümlədən mənzil, torpaq idarəçiliyi, infrastruktur və dayanıqlı inkişaf siyasətlərində mənalı iştirakının təmin edilməsinin vacibliyini vurğulayırıq.

Bir daha qeyd edirik ki, davamlı urbanizasiya tarixi ədalətsizliklərin aradan qaldırılması, sosial bərabərliyin təşviqi, insan ləyaqətinin qorunması və bütün icmalar üçün imkan və resurslara bərabər çıxış təmin edilmədən tam şəkildə həyata keçirilə bilməz”.

Konfrans iştirakçıları dənizaşırı ərazilərin nümayəndələri, ekspertlər, vətəndaş cəmiyyəti aktorları və gənclər nümayəndələri arasında dialoq platformasının yaradılmasına çalışıldığını və bunun kolonial idarəetmə, azlıqların hüquqları və şəhər bərabərsizliyi arasındakı əlaqə barədə fikir mübadiləsi aparılması və beynəlxalq məlumatlılığın artırılması məqsədi daşıdığını vurğulayıblar.

İştirakçılar ədalət, bərabərlik, inklüziv şəhər inkişafı və struktur bərabərsizliklərdən təsirlənən xalqların və azlıqların hüquqlarının təşviqinə yönəlmiş beynəlxalq dialoq və əməkdaşlığı dəstəkləmək öhdəliyini bir daha təsdiqləyiblər.