Qazilərimizin, şəhidlərimizin  şücaəti hesabına qazanılmış tarixi qələbə yüksək mənəviyyatın qazancı oldu. İkinci Qarabağ savaşının əfsanəvi döyüşçülərinin həyat yoluna və döyüş anlarına nəzər salmaq,   qaliblərin xatirəsini əbədiləşdirmək, şəhidlərimizin həyat hekayətini yazmaq şükürdür.

 Tarixi qələbəmiz bizə qəhrəmanlarımızı tanıtdı. O fədakar oğullar döyüş meydanında dastan yazdılar. İndi isə onlardan biri haqqında danışırıq.

Kamran Füzuli oğlu Hacıyev 1994-cü il yanvarın 16-da Xəzər rayonunun Şüvəlan qəsəbəsində anadan olub. Azərbaycan Ordusunun çavuşu olan Kamran Hacıyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpası naminə başlanan Vətən müharibəsi zamanı Füzulinin və Hadrut qəsəbəsinin azadlığı uğrunda gedən döyüşlərdə iştirak edib. Kamran Hacıyev oktyabrın 22-də Hadrut döyüşləri zamanı şəhid olub. Xəzər rayonunun Şüvəlan qəsəbəsində dəfn olunub.

Çox diqqətli, məsuliyyətli, vətən sevdalısı olub Kamran. Döyüş yoldaşları onun igidliyindən söhbət açırlar. Qarabağ müharibəsinin qazisi, kapitan Rauf Əliyev: “Kamrandan nə qədər danışsam, yenə də azdır. Uşaqların hərəsi bir igid idi mənim üçün, amma o bir başqaydı. Bizim təminatçımız idi. İnsanlığı, mərdliyi ilə hamımızın sevimlisinə çevrilmişdi. Elə olub ki, bir neçə gün mühasirədə qalmışıq.  Ərzaq bir yana, susuzluqdan əziyyət çəkmişik. Bir də görürdük Kamran su qabaları ilə gəlir. Kamran vardısa, kimsə ac-susuz qalmazdı. Sehrbaz kimiydi. İnsan nə qədər qorxmaz, cəld, bacarıqlı olar. Ən çətin tapşırıqları ona verirdik. Əsl hərbçi idi. Minamyotun səsindən harda olduğunu müəyyən edirdi. Taborun ürəyi idi. Bir dəfə birlikdə su gətirməyə getmişdik. Orda bayrağımız  dalğalanırdı. Bayrağın yanında dayanıb dedi: “Bu bayrağa bax! Bax bu bayraq üçün şəhid olmağa dəyər!”.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılıb və hərbi hissə qarşısında qoyulmuş tapşırıqların icrası zamanı vəzifə borcunu şərəflə, ləyaqətlə yerinə yetirdiyinə görə  Azərbaycan Respublikasının Prezidenti İlham Əliyevin Sərəncamına əsasən Kamran Hacıyev ölümündən sonra “Vətən uğrunda”, “Xocavəndin azad olunmasına görə” medalı ilə təltif edilib.

 İndi ölkəmizdə igidlərimizin adını daşıyan xeyli küçələr var. Bu küçələr həm də bizim ömür yolumuzdur. Gələcək nəsillərin ömür yoludur–Şüvəlandakı Kamran Hacıyev küçəsi kimi. Biz bu yolları qürurla, həm də ləyaqətlə keçməliyik. Belə yollar, belə küçələr zəngin xatirələri, qürurlu keçmişi özündə yaşadacaq tarixdir. Bu tarix həm də gələcəyə boylanır.