Mənim üçün Şuşa sadəcə bir şəhər deyildi. O nəfəs aldığım hava, addım atdığım torpaq, gəncliyimin səsi idi. 90-cı ilin o ağır günlərinə qədər biz Şuşanı yalnız gözəlliyi ilə tanıyırdıq. Amma müharibə gələndə hər şey dəyişdi.

 8 may yaxınlaşdıqca şəhərin üzərinə çökmüş qaranlıq daha da sıxlaşırdı. Bizim silahımız az, düşmən isə ən güclü silahlarla silahlanmışdı. Amma bizim torpağa olan sevgimiz vardı. Biz geri çəkilməyi düşünmürdük. Son günə qədər Şuşada qaldım. Bu torpağı tərk etmək fikri belə ürəyimi parçalayırdı.

Yadımdadır… Bəzən iki nəfər bir avtomat darağını bölüşürdük. Hər güllənin qiyməti canımız qədər dəyərli və əziz idi. Silah yoldaşlarımla birlikdə hər qarışı qorumağa çalışırdıq. Şuşa dağlarının hər daşında bizim izimiz, hər qayasında bizim nəfəsimiz qalmışdı. Yorğunluq vardı, aclıq vardı, amma qorxu yox idi. 

O günlərdə insan daha çox anlayır – torpaq nədir, Vətən nədir. Şuşa bizim üçün sadəcə bir məkan deyildi, o, namus idi, qeyrət idi. Biz  fikirləşirdik  ki, bəlkə də geri dönə bilməyəcəyik, amma son ana qədər mübarizə aparmalıydıq.

 Və o gün gəldi… 8 may. Şuşa işğal olundu. Şəhər susdu, amma bizim içimizdə bir səs qaldı – qayıdacağıq! Mən o günü heç vaxt unutmadım. Çünki o gün təkcə torpaq yox, bir parça ürəyimiz də işğal olundu.

 İllər keçdi. Amma Şuşanın həsrəti heç vaxt keçmədi. Hər dəfə o dağları, o küçələri xatırlayanda içimdə bir ümid yaşayırdı – bir gün mütləq qayıdacağıq.

Və nəhayət, o gün gəldi…

8 noyabr 2020-ci il. Bu tarix təkcə bir qələbə deyil, bir xalqın dirçəlişi idi. Şuşa azad olundu! O möhtəşəm xəbəri bizə çatdıran Ali Baş Komandan cənab İlham Əliyev idi. Onun gözlərindəki sevinc parıltısı, səsindəki qürur və qətiyyət sanki bir sözlə ifadə olunurdu – “Dəmir yumruq!” Bu ifadə artıq təkcə bir şüar deyil, xalqın birliyinin, gücünün və sarsılmaz iradəsinin rəmzinə çevrilmişdi. 

Onun səsi ilə səslənən bu xəbər, əslində, bütün xalqın ürəyindən gələn bir nida idi. Sanki illərlə susan Şuşa həmin an danışdı – “Mən qayıtdım!”

O anı izləyərkən göz yaşlarımı saxlaya bilmədim. Bu, təkcə sevinc deyildi. Bu, 28 illik həsrətin sonu, şəhidlərimizin ruhunun rahatlıq tapdığı an idi.

Şuşa yenidən bizim oldu. İndi isə yeni bir dövr – quruculuq və dirçəliş dövrü başladı. 

Cənab Prezidentin rəhbərliyi ilə Şuşada və ümumilikdə azad olunmuş torpaqlarda genişmiqyaslı işlər həyata keçirilir. Qısa müddətdə mühüm infrastruktur layihələri icra olundu. “Zəfər yolu” salındı – elə bir yol ki, yalnız fiziki deyil, mənəvi qələbənin də simvoluna çevrildi.

Tarixi abidələr bərpa edilir, məscidlər yenidən ucaldılır, Şuşanın mədəni ruhu dirçəldilir. Vaxtilə dağıdılmış şəhərdə indi beynəlxalq tədbirlər keçirilir, musiqi festivalları təşkil olunur, həyat yenidən canlanır.

Yeni yaşayış binaları tikilir, müasir infrastruktur qurulur. Şuşa artıq keçmişin yaralı şəhəri deyil – o, gələcəyin inkişaf edən, dirçələn mədəniyyət paytaxtıdır.

Mən bilirəm ki, o torpağın hər qarışında mənim də izim var. Silah yoldaşlarımın xatirəsi var. Biz o torpağı qorumaq üçün döyüşdük, bu gün isə dövlətimiz onu daha da ucaldır.

Şuşa artıq təkcə bir şəhər deyil…

O qürurdur.

O zəfərdir.

O “Dəmir yumruq” iradəsinin təcəssümüdür.

Və mən fəxr edirəm ki, o torpağın müdafiəsində bir izim qalıb.

Çünki Şuşa – bizimdir!

Həmişə bizim olacaq!

    Hörmətlə,
Azərbaycan Bayragı Ordeni və Vətən ugurunda medalı ilə təltif olunan, ehtiyatda olan polis polkovniki Mübariz Quliyev