Türkiyə Prezidenti Rəcəb Tayyib Ərdoğan Avropa İttifaqını (Aİ) tənqid edərək bildirib ki, Ankaradan uzaqlaşma siyasəti Aİ-nin inkişaf tempinin azalmasına gətirib çıxarıb.

Türkiyə lideri Ankarada hökumətin iclasının yekunlarına dair brifinqdə çıxış edib. O, bildirib ki, Lüksemburqda keçirilmiş Aİ sammitində eyni vaxtda 12 dövlətə namizəd ölkə statusu verilib, halbuki Türkiyənin müraciəti nəzərə alınmayıb.

“Avropa İttifaqına gedən yolda biz 53 normativ aktın 218 maddəsinə dəyişikliklər etdik. Türkiyə parlamenti iki konstitusiya islahatı paketini qəbul edib, lakin 2004-cü ildə Aİ öz tarixində ən böyük genişlənməni həyata keçirərək 10 ölkəni sıralarına qəbul etdi, Türkiyə isə istisna olundu”, – deyə siyasətçi bildirib.

Onun sözlərinə görə, bu gün Ankara Aİ institutları və üzv ölkələri ilə intensiv müzakirələri davam etdirir.

“Keçən əsrin ortalarındakı ilk müraciətimizdən bəri Türkiyəyə qarşı xüsusilə də Avropa cəmiyyətinin müəyyən təbəqələrində mövcud olan dərin kök salmış qərəzləri aradan qaldıra bilməmişik. Avropada hər zaman demokratiyamız, iqtisadiyyatımız, əhalimiz və ya dinimiz Türkiyəni kənarlaşdırmaq üçün bəhanə kimi istifadə olunub. Hər dəfə Türkiyənin tamhüquqlu üzvlüyü prosesini ləngitmək üçün səbəb tapılıb”, – deyə o qeyd edib.

Prezident Ərdoğan həmçinin vurğulayıb ki, Türkiyə iqtisadiyyatı və demokratik institutları gücləndirərək dəyişir, lakin Avropa dairələrinin Ankaraya münasibətdə təhrif olunmuş yanaşması dəyişməz qalır.

Onun sözlərinə görə, strateji uzaqgörməzlik Aİ-nin bir çox institutlarında qalmaqdadır: “Məsələ Türkiyənin hansı inkişaf mərhələsində olmasında deyil, Brüsselin gələcəkdə özünü harada görmək istəməsindədir. “Dərk etmək lazımdır ki, Türkiyə birliyin tamhüquqlu üzvü olmadan Avropa İttifaqı qlobal oyunçuya və cazibə mərkəzinə çevrilə bilməyəcək. Biz elə bir ölkə deyilik ki, yalnız zərurət yarananda xatırlansın və qapısı döyülsün”.