Kanadada aparılan genişmiqyaslı elmi araşdırma beyin sağlamlığının qorunmasında əsas amilləri müəyyən edib.

 Avstraliyanın “Science alert” saytı xəbər verir ki, Kanadadakı “York University”nin tədqiqatçıları tərəfindən həyata keçirilən araşdırma çərçivəsində təxminən 4,5 milyon insanı əhatə edən 70-ə yaxın müxtəlif elmi iş təhlil olunub. Mütəxəssislər 35 yaşdan etibarən toplanmış məlumatlar əsasında fiziki aktivlik, oturaq həyat tərzi və yuxu müddəti arasındakı əlaqəni araşdırıblar.

Tədqiqatın nəticələrinə görə, həyat tərzində edilən dəyişikliklər gələcəkdə yarana biləcək idrak zəifləməsinin qarşısını əhəmiyyətli dərəcədə ala bilər. Xüsusilə keyfiyyətli yuxunun demensiya riskinin azaldılmasında mühüm rol oynadığı müəyyən edilib.

Məlumatlar göstərib ki, gecə yuxusu 7 saatdan az olan şəxslərdə demensiya riski 18 faiz artır. Eyni zamanda, 8 saatdan artıq yuxu da beyin sağlamlığına mənfi təsir göstərir və bu halda risk 28 faizə qədər yüksəlir. Alimlər artıq uzunmüddətli yuxunun Altsheymer xəstəliyinin erkən əlamətlərindən biri ola biləcəyini istisna etmirlər.

Araşdırmada fiziki aktivlik də əsas amillərdən biri kimi qeyd olunub. Gündə 8 saatdan çox oturan və həftəlik fiziki aktivliyi 150 dəqiqədən az olan şəxslərdə demensiya riskinin əhəmiyyətli dərəcədə artdığı müəyyən edilib. Bildirilib ki, müntəzəm idman beyində qan dövranını yaxşılaşdırır, sinir hüceyrələrinin təmizlənməsinə kömək edir və ürək-damar sağlamlığını qoruyaraq idrak funksiyalarını dəstəkləyir.

Mütəxəssislər vurğulayıblar ki, demensiyanın dəqiq müalicə üsulu hələ mövcud olmadığından profilaktik tədbirlər xüsusi əhəmiyyət daşıyır. Onların sözlərinə görə, dünyada demensiya hallarının təxminən yarısı qarşısı alına bilən amillərlə bağlıdır.

Araşdırma qrupu hesab edib ki, 35 yaşdan etibarən aktiv həyat tərzi sürmək, oturaq vaxtı məhdudlaşdırmaq və yuxu rejimini gündə 7-8 saat səviyyəsində saxlamaq beyin sağlamlığının qorunmasına və xəstəliyin yaranmasının gecikdirilməsinə mühüm töhfə verir.